ئیخڵاس دلێمی: بە دڵنیاییەوە مووچەی مانگی 12ـی فەرمانبەران دەدرێت

ئاڤا نیوز

 

لەسەر بانگهێشتی لیژنەی دارایی پەرلەمانی عێراق، كۆبوونەوەیەك بە ئامادەبوونی ئەندامانی لیژنەكە لەگەڵ تەیف سامی، وەزیری دارایی عێراق دەستی پێكردووە و یەكێك لە بابەتە گرنگەكانی كۆبوونەوەكە شایستە داراییەكانی خەڵكی كوردستان دەبێت.

 

بۆچی گرنگە: بە مەبەستی دەستپێکردنەوەی هەناردەی نەوتی کوردستان، بڕیارە پەرلەمانی عێراق لە دانیشتنی ڕۆژی دووشەممەی داهاتوو خوێندنەوەی دووەم بۆ هەمواری یاسای بودجە بکات و كۆبوونەوەكەی ئەمڕۆش ئامادەكارییە بۆ ئەو دانیشتنە.

 

لێدوانی فەرمی: ئیخڵاس دلێمی، جێگری سەرۆكی لیژنەی دارایی لە پەرلەمانی عێراق بە ئاڤا میدیای ڕاگەیاند: لە كۆبوونەوەی ئەمڕۆمان لەگەڵ تەیف سامی، وەزیری دارایی عێراق گفتوگۆمان سەبارەت پرسی هەناردەكردنەوەی نەوتی هەرێمی كوردستان كرد و بابەتەكە لە كارنامەی دانیشتنی داهاتووی پەرلەمانی عێراقیش دەبێت.

 

ئەوەی پێویستە بیزانیت: ئیخڵاس دلێمی، سەبارەت بە مووچەی مانگی 12ـی فەرمانبەرانی هەرێمی كوردستان گوتی: ئەگەر كەمێكیش دوابكەوێت، بەڵام مووچەی مانگی 12 دەدرێت و نابێت بەغدا مووچە بە كەموكوڕییەوە بنێرێت، دەبێت تەواوكاری ئەو بڕە بنێرێت كە بۆ ئەو مانگە نێردراوە، دڵنیایی دەدەم كە مووچەی فەرمانبەرانی هەرێمی كوردستان نافەوتێت.

 

زانیاریی زیاتر: جگە لە پرسی هەناردەكردنەوەی نەوت، وابڕیارە لە كۆبوونەوەكەدا پەرلەمانتارە كوردەكان سەبارەت بە شایستە داراییەكانی هەرێمی كوردستان پرسیار ئاراستەی وەزیری دارایی عێراق بكەن و لێی بپرسن بۆچی مووچە لە كاتی دیاركراو و بە بڕی پێویست نانێردرێ.