وه‌زاره‌تى كاره‌با: خواست لەسەر کارەبا بۆ سەرووی حەوت هەزار مێگاوات بەرز بووەتەوە

ئاڤا نیوز

 

وەزارەتی كارەبای هەرێمی كوردستان ڕایدەگەیەنێت، لە وەرزی زستاندا خواست لەسەر كارەبا حەوت هەزار و 500 مێگاواتی تێپەڕاندووە.

 

ڕاگەیێنراوی فەرمی: لە ڕاگەیێنراوەکەی وەزارەتی كارەبای حكومەتی هەرێمی كوردستاندا هاتووە، پێشتر بەرهەمهێنانی كارەبا تەنیا سێ هەزار و 500 مێگاوات بوو، لە كابینەی نۆیەمدا هەزار و 500 مێگاواتی دیكە زیاد كراوە، بەڵام لە هەمان كاتدا 460 هەزار هاوبەشی نوێی كارەبا زیادبوونە و خواستی كارگەكانی چیمەنتۆ، ئاسن، كارگە پیشەسازییەكانی دیكە و پڕۆژەكانی وەبەرهێنان و 'سیتی'ـیەكان لەسەر كارەبا زیاتر بووە، بۆیە لەئێستادا خواست لەسەر كارەبا حەوت هەزار و 500 مێگاواتی تێپەڕاندووە.

 

 وەزارەتی كارەبا ڕوونیشی كردۆتەوە، نەخۆشخانەكان و پڕۆژەكانی ئاو و دامودەزگا ئەمنییەكان و بەندیخانە و خاڵە سنوورییەكان، كارەبای بەردەوامیان بۆ دابینكراوە، تێكڕای پێدانی كارەباش بە هاووڵاتییان لە ساڵی 2024 نزیكەی 13 كاتژمێر بووە.

 

هۆكارە زانراوەكان: تێچووی بەرهەمهێنانی کارەبا لە قەیرانی دارایی و کێشە تەکنیکییەکانی گواستنەوەی سووتەمەنی بۆ وێستگەکانی بەرهەمهێنانی کارەبا و هێرشە تیرۆریستییەکانی سەر کێڵگەکانی گاز و شوێنی کارکردنی کۆمپانیای دانەغاز؛ ئەوەندەی دیکە کاریگەریی نەرێنیيان بۆ سەر بەرهەمهێنانی کارەبا دروست کردووە.

 

چارەسەر چییە: وەزارەتی كارەبا بۆ باشترکردنی دۆخی کارەبا وێڕای زیادكردنی ئەو هه‌زار و 500 مێگاواتە، تەنیا لە سێکتەری گواستنەوە زیاتر لە دەیان وێستگەی گواستنەوە و بگۆڕ و مۆبایلی کارەبای لە ناوچە جیاوازەکانی هەرێمی كوردستان دامەزراندووە و بە درێژایی 350 كیلۆمەتر هێڵی کارەبای 132 كەی ڤیی پاڵەپەستۆی بەرز و 33 كەی ڤی ڕاكێشاوە و سەدان پرۆژەی دیكەی لە تۆڕی دابەشكردنی ناوخۆ بنیات ناوە و کارەبای گەیاندووەتە سەرجەم ناوچە و گوندە دوورەدەستەکانی هەرێمی كوردستان.

 

خاڵە ئەرێنییەكان: وه‌زاره‌تى كاره‌با، هاووڵاتییان دڵنیادەكاته‌وه‌ كه‌ بەپێی ئەو بەرنامەیەی دایناوە، لە ڕێگەی سیستەمی پێوەری زیرەك و پرۆژەی ڕووناكي، دۆخی کارەبا بەرەو باشبوون دەچێت.