ئاڤا نیوز

 

سەردانەکەی شاسوار عەبدولواحید بۆ تورکیا نیگەرانی یەکێتی لێکەوتەوە، سەرۆکی جوڵانەوەکەش دەڵێت، لە داهاتوودا دووبارە سەردانی تورکیا دەکەمەوە و ئەوانەی پێیان ناخۆشە کام تاشە بەردی زۆر گەورەیە با سەری خۆیانی لێبدەن.

 

چیرۆکی سەرەکەی: ڕۆژی سێشەممە ڕێککەوتی 7ـی 1ـی 2025، شاسوار عەبدولواحید لە ئەنقەرە لەگەڵ نوح یڵماز، یاریدەدەری وەزیری دەرەوەی تورکیا کۆبووەوە. ئەم سەردانەی شاسوار عەبدولواحید بە یەکەم سەردانی فەرمی و ئاشکرای دادەنرێت بۆ تورکیا لەدوای دامەزراندنی جووڵانەوەکەی لە ساڵی 2018 دا.

 

لێدوانی فەرمی: شاسوار عەبدولواحید: سەرۆکی جوڵانەوەی نەوەی نوێ ڕایگەیاند:

 

- ئێمە هێزێکین خۆمان بە بەدیلی پارتی و یەكێتی دەزانین.

- جگە لە دیداری باڵیۆزان لە بەغدا و لە سلێمانی و ئەو سەردانانەی بۆ وڵاتانی ڕۆژئاوا کردوومن،  پێشووتر من دوو جار سەردانی ئێرانم کردووە، ئەم جارەش سەردانی تورکیام کرد.

 

- لە داهاتوودا دووبارە سەردانی تورکیا دەکەمەوە، ئەوانەی پێیان ناخۆشە کام تاشە بەردی زۆر گەورەیە با سەری خۆیانی لێبدەن.

- تورکیا وڵاتێکی گرنگە لە ناوچەکە، هەروەک چۆن پێشووتر ئێران وابووە. ئێمە پەیوەندییەکی زۆرباشمان لەگەڵ هەموو لایەکدا هەیە.

- ئێمە وەک ئەو حیزبە بچووکە شاگردانە نین کە لە هەولێر و سلێمانی دانیشتوون و خەریکی بۆڵە بۆڵن، بە هەموویان ناتوانن کێشەیەک چارەسەر بکەن.

 

ئەوەی پێویستە بیزانیت: لەو کاتەی شاسوار عەبدولواحید لە تورکیا بوو، سەرۆکوەزیران مەسرور بارزانییش بە سەردانێکی فەرمی لەوێ بوو، بەڵام بەپێی زانیارییەکانی ئاڤا بە ڕێکەوت (سوتفە) بووە و سەردانی هەردووکیان هیچ پەیوەندییەکی بەیەکەوە نەبووە.