بافڵ تاڵەبانی: ناكۆكی و لێكترازان بە هەموو شێوەیەك ڕەتدەكەینەوە

ئاڤا نیوز

 

بافڵ تاڵەبانی بە ناڕاستەوخۆ پشتگیری دەستپێشخەرییەکەی سەرۆکوەزیران مەسرور بارزانی دەکات و دەڵێت، "ناكۆكی و لێكترازان بە هەموو شێوەیەك ڕەت دەكەینەوە و پێكەوە هەرێمەكەمان بەرەو ئاوەدانی و سەقامگیری ئاراستە دەكەین".

 

وێنە گەورەکە: دەستپێشخەرییە نیشتمانییەكەی سەرۆکوەزیران مەسرور بارزانی، بۆ یەکدەنگی و یەکهەڵوێستی لایەنە کوردستانییەکان بەرامبەر بەغدا لەپێناو دابینکردنی مووچە و بودجە ومافە دەستوورییەکانی خەڵکی کوردستان، کەشێکی سیاسیی ئەرێنی ڕەخساندووە، بووەتە لێک نزیکردنەوەی سەرجەم لایەنەکان و ئەمەش هەنگاوەکانی کابینەی 10ی حکومەتی هەرێمی کوردستان خێراتر دەکات.

 

ڕاگەیێنراوی فەرمی: بافڵ تاڵەبانی، سەرۆکی یەکێتیی نیشتمانیی كوردستان، لە پێگەی فەرمی خۆی لە تۆڕی كۆمەڵایەتیی فەیسبووك ڕایگەیاندووە: "ئێمە ناکۆکی و لێکترازان بەهەمووشێوەیەک ڕەتدەکەینەوە و ئامانجمان ئاشتی و پێکەوەژیانە، بەڵام بەرگریکردن لە مافەکانی خەڵک و وەڵامدانەوەی داواکارییە ڕەواکانیان بە ئەرکی خۆمان دەزانین، بۆیە هیوادارین هەموو لایەنەکانی دیکەش بەم نییەتەوە هەنگاوبنێن و پێکەوە هەرێمەکان بەرەو ئاوەدانی و سەقامگیری ئاراستە بکەین".

 

لەلایەکی دیکەوە: لەبارەی دۆخی هەرێمی کوردستان و پێکهێنانی حکومەتی نوێوە، بافڵ تاڵەبانی ڕایگەیاند: "دەبێت حکومەتی داهاتوو دادپەروەرانە و دوور لە هەموو بیرکردنەوەیەکی حیزبی کار بۆ سەرجەم خەڵکی کوردستان بکات و خزمەتیان بکات."

 

باكگراوند: ڕۆژی شەممە 11-1-2025، كۆبوونەوەی نائاسایی ئەنجوومەنی وەزیرانی حكومەتی هەرێمی كوردستان بە سەرپەرشتی سەرۆكوەزیران، مەسرور بارزانی، قوباد تاڵەبانی، جێگری سەرۆكی حكومەتی هەرێمی كوردستان و بە بەشداری وەزیرە كوردەكانی حكومەتی فیدراڵی و نوێنەری فراكسیۆنە كوردستانییەكانی پەرلەمانی عێراق، لە شاری هەولێر بەڕێوەچوو، لەپێناو یەكڕیزی و هاوهەڵوێستی لایەنە كوردستانییەكان لەبەرامبەر پێشێلکردنی مافە دەستوورییەکانی هەرێمی کوردستان لەلایەن حکومەتی فیدراڵییەوە.