وەزارەتی کارەبا: سبەی دۆخی کارەبا ئاسایی دەبێتەوە

ئاڤا نیوز

 

وەزارەتی کارەبا ڕوونکردنەوەیەکی لەبارەی کەمبوونەوەی پێدانی کاتژمێرەکانی کارەبای نیشتمانی بڵاوکردەوە و دەڵێت، لە چوارچێوەی پەرەپێدانی کێڵگەی غازی کۆرمۆرەوە 750 مێگاوات كارەبا كەمبووەتەوە و سبەی دۆخەکە ئاسایی دەبێتەوە.

 

ڕاگەیێنراوی فەرمی: وەزارەتی کارەبای حکومەتی هەرێمی کوردستان ڕایگەیاند: هاوبەشانی کارەبا ئاگادار دەکەینەوە لەچوارچێوەی پەرەپێدانی کێڵگەی غازی کۆرمۆرەوە بۆ ماوەی 10 كاتژمێر پەستانی غاز كەمبووەتەوە و بەهۆیەوە 750 مێگاوات كارەبا كەمبووەتەوە.

 

زانیاریی زیاتر: بەپێی ئەو پلانەی کە داناغاز دایناوە بڕیارە تا کاتژمێر (8:00)ی بەیانی رۆژی شەممە، دۆخەكە ئاسایی ببێتەوە. 

 

لەلایەکی دیکەوە: هەر لە ڕاگەیێنراوەکەی وەزارەتی کارەبادا هاتووە، تیمەكانی كۆنترۆڵی كارەبا بە هەماهەنگی لەگەڵ تیمەكانی بەرهەمهێنانی كارەبا، بڕی 250 مێگاوات كارەبایان لە هەردوو وێستگەی دووکان و دەربەندیخان زیاد كردووە.