هاکان فیدان: پەکەکە 700 گوندی لە کوردستان داگیرکردووە

ئاڤا نیوز

 

هاکان فیدان، وەزیری دەرەوەی تورکیا لە چوارچێوەی کۆبوونەوەی لووتکەی ئاسایشی پێنج قۆڵی نێوان تورکیا، سووریا، عێراق و ئوردن و لوبنان کە لە ئوردن بەڕێوەچوو، باسی لە کۆتاییهێنان بە چالاکییەکانی پەکەکە کرد لە تورکیا و عێراق و گوتی: "پەکەکە لە تورکیا یەک مەتر زەوی کۆنترۆڵ نەکردووە بەڵام لە کوردستان 700 گوندی داگیرکردووە". 

 

بۆچی گرنگە: ئەم قسانەی فیدان لەکاتێکدایە پەکەکە لەسەر داوای ڕێبەرەکەیان بڕیاری خۆ هەڵوەشاندنەوەی داوە، بەڵام تورکیا دەیەوێت تەنیا پەکەکە نا بەڵکو گرووپەکانی دیکەی سەر بە پەکەکەش چەک دابنێن و خۆیان هەڵبوەشێننەوە.

 

چیرۆکی سەرەکی: کۆبوونەوەی لوتکەی ئاسایشی پێنج قۆڵی تایبەت بوو بە پرسی بەرەنگاربوونەوەی تیرۆر و دۆخی سووریا، فیدان جەختی لەوە کردەوە کە کاری لە پێشینەیان "سڕینەوەی پەکەکەیە لە عێراق و سووریا، کۆتاییهێنانە بە چالاکییەکانی" هاوکات لە کۆبوونەوەکەدا بڕیار لەسەر کاری هاوبەشی هەواڵگری و سەربازی بۆ بەرەنگاربوونەوەی تیرۆر بە تایبەتی داعش درا. 

 

لێدوانی فەرمی: وەزیری دەرەوی تورکیا لە کۆنگرە ڕۆژنامەوانی هاوبەشدا گوتی: پەکەکە نەیتوانیوە یەک مەتر لە خاکی تورکیا کۆنترۆڵ بکات، بەڵام لە کوردستان 700 گوندی داگیرکردووە.

- ئێمە بەشی خۆمانمان چارەسەرکرد، ئەی بەشەکانی کەی دیکەی لە سووریا کە سێ یەکی خاکەکەی کۆنترۆڵ کردووە کێ چارەسەری دەکات، ئەی ئەو گرووپانەی پەکەکە لە عێراق. 

- ئەوەی ئێستا لە سووریا ڕوودەدات هەوڵێکە بۆ دروستکردنی ناکۆکی نەتەوەیی.

- ئیدارەی سووریا هەوڵدەدات ئەو دۆخەی ئێستا کۆنترۆڵ بکات. 

ئەمەش بزانە: بڕیار وایە کۆبوونەوەی لووتکەی ئاسایشی پێنج قۆڵی جاری داهاتوو لە تورکیا بکرێت.