پێنج کورد لە ڕۆژهەڵاتی کوردستان بەهۆی ئاهەنگەکانی نەورۆز دەستگیر دەکرێن

ئاڤا نیوز

 

پێنج هاووڵاتیی کورد لە مەریوان لە ڕۆژهەڵاتی کوردستان بەهۆی ئاهەنگەکانی نەورۆزەوە لەلایەن هێزە ئەمنییەکانی ئێرانەوە دەستگیر دەکرێن.

 

ڕاگەیێنراوی فەرمی: ڕێکخراوی مافی مرۆڤی هەنگاو ڕایگەیاند: ڕۆژی هەینی 21-3-2025، کە یەکەم ڕۆژی جەژنی نەورۆز بووە، پێنج هاووڵاتیی کوردی خەڵکی شاری مەریوان، بەناوەکانی ئارام نیکپەی، محەممەد نیکپەی، محەممەد ئەشتەک، تەحسین دادڕەس و بیلال دادڕەس بەهۆی ڕێوڕەسمەکانی نەورۆز لە ڕۆژهەڵاتی کورستان دەستبەسەر کراون.

 

زانیاریی بەدەستهاتوو: بەپێی زانیارییەکان، ئارام نیکپەی تەمەن 38 ساڵە، محەممەد نیکپەی 28 ساڵ، محەممەد ئەشتەک 23 ساڵ، هاوکات هەر سێکیان خەڵکی گوندی "نێ"ی سەر بە شاری مەریوان.

زانیاریی زیاتر: تەحسین دادڕەس، بەندکراوی سیاسی پێشووی تەمەن 31 ساڵ و بیلال دادڕەس ــی 36 ساڵ، هەرووکیان خەڵکی گوندی"سەردۆش"ی مەریوانن، بەبێ نیشاندانی هیچ بەڵگەیەکی دادوەری دەستبەسەر کران و بۆ شوێنێکی نادیار گواسترانەوە.

 

ئەوەی پێویستە بیزانیت: سەرچاوەیەکی ئاگادار بە ڕێکخراوەکەی ڕاگەیاندووە، دەستبەسەرکردنی ئەو هاووڵاتییانە پەیوەندی بە ڕێوڕەسمەکانی نەورۆز لە ڕۆژهەڵاتی کوردستاندا هەبووە و ناوەندە ئەمنییەکان لە وەڵامی چارەنووس و بارودۆخی ئەو هاووڵاتییانە خۆیان بەدوور دەگرن.