بەڕێوەبەرایەتیی گشتیی خانەنشینی دەنگۆیەک ڕەتدەکاتەوە

ئاڤا نیوز

 

دوای بڵاوبوونەوەی دەنگۆیەک کە گوایە پاداشتی خانەنشینی بە قیست دەدرێتەوە خانەنشینان، بەڕێوەبەرایەتی گشتیی خانەنشینی هەرێمی کوردستان لەمبارەیەوە دەڵێت 'ئەوە ڕاست نییە'.

 

بابەتی سەرەکی: ئەو کەسانەی خانەنشین دەکرێن پاداشتی خانەنشینی شەش مانگی بنەڕەتییان و 12 مانگی ساڵەکەیان پێ دەدرێت، دوای بڵاوبوونەوەی دەنگۆیەک کە گوایە ئەو پاداشتەیان بە قیست لەلایەن حکومەتەوە پێ دەدرێت، ئاڤا بەدواداچوونی بۆ ڕاستی و دروستی بابەتەکە کرد و میکانیزمی پێدانی پاداشتەکەی ئاشکرا کردووە.

 

زانیاریی تایبەت: سەرچاوەیەکی باڵا لە بەڕێوەبەرایەتیی گشتیی خانەنشینی هەرێمی کوردستان، بە ئاڤا میدیای ڕاگەیاند: "شتی وام نەزانیوە، ئەو شەش مانگەی پاداشتی بنەڕەتی خانەنشینەکە کەسەکە خۆیەتی و بە قیست نادرێتەوە، هەروەها پاداشتی 12 مانگەکەش لە بەغداوە دێت.

 

-هەر فەرمانبەرێک کە خانەنشین دەبێت، لە فەرمانگەکەیەوە نووسراوێک بۆ خەزێنە بۆ دەکرێت، هەروەها خەزێنەش ناوەکەی دەنووسێت و ڕەوانەی بەغدای دەکات، کە پارەکە لەلایەن بەغداوە ڕەوانە کرا، ئەوا خانەنشینەکان پاداشتەکەیان وەریدەگرن و بە قیست نییە. 

 

ئەوەی پێویستە بیزانیت: تاوەکو ئێستا خانەنشینانی نوێ سوودمەند نەبوون لە پاداشتی شەش مانگە بنەڕەتییەکە و 12 مانگەکەیان کە لە بەغداوە خەرج دەکرێت.