کێشەی خەرجیی فەرمانگەکانی حکومەت و بەڵێندەران چارەسەر دەکرێت

ئاڤا نیوز

 

کێشەی خەرجیی فەرمانگەکانی حکومەت و بەڵێندەران چارەسەر دەکرێت و لەمەودوا هەر بەڕێوەبەری بانکێک دەتوانێت تاوەکو بڕی 10 ملیۆن دینار بۆ هەر فەرمانگە و بەڵێندەرێک خەرج بکات.

 

وێنە گەورەکە: فەرمانگەکانی سنووری پارێزگاکانی سلێمانی و هەڵەبجە و ئیدارەکانی ڕاپەڕین و گەرمیان، لەگەڵ بەڵێندەران، بەردەوام گلەییان دەکرد کە خەرجی [نەسرییە]ـی مانگانەیان بۆ خەرج ناکرێت؛ بەجۆرێک ئەگەر فەرمانگەیەک ملیۆنێک یان دوو ملیۆن خەرجی هەبوایە، بۆی خەرج نەدەکرا، یاخوود پارەی پڕۆژە بەردەوامەکانیان [سولفەکانیان] بۆ خەرج نەدەکرا، ئەمەش کاریگەری لەسەر کارەکانیان دروست کردبوو.

 

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای ڕایگەیاند، ڕاستە کێشە هەبووە، هۆکارەکەی ئەوە بووە، پارەی هەردوو پارێزگای سلێمانی و هەڵەبجە و ئیدارەکانی ڕاپەڕین و گەرمیان دەنێردرا بۆ بانکی ناوەندیی هەرێم لە سلێمانی، بەڵام لەمەودوا دەچێتە بانکی ئاشتی.

 

چارەسەرەکان: بەپێی گشتاندنی دارایی ژمارە 38  کە  1/2/2024 تایبەت بە پێدانی دەسەڵاتی خەرجی بۆ بەڕێوەبەری بانکەکان دەرچووە، هەر بەڕێوەبەری بانکێک دەتوانێت تاوەکو بڕی 10 ملیۆن دینار بۆ هەر فەرمانگە و بەڵێندەرێک خەرج بکات بەبێ گەڕانەوە بۆ وەزارەت، بە مەرجێک بڕیاری خەرجکردنی پارەکە هەبێت.

 

ئەوەی پێشبینی دەکرێت: چیدیکە فەرمانگەکان خەرجیی و سولفەکانیان بە بیانووی نەبوونی دەسەڵات یاخوود دابەشکرنی مووچە دوا ناکەوێت.