پسپۆڕێکی ئابووری: عێراق بەرەو قەیرانێکی دارایی مەترسیدار دەڕوات و کورتهێنان دەگاتە 15 تریلیۆن دینار

ئاڤا نیوز

پسپۆڕێکی ئابووری ڕایدەگەیێنێت، دۆخی دارایی عێراق لە ناوەڕاستی پشێوییە سیاسییەکاندا بەرەو قەیرانێکی مەترسیدار دەڕوات. داتا ئابوورییەکان ئاشکرای دەکەن کە کورتهێنانی دارایی ڕاستەقینە تا کۆتایی مانگی 8ی 2025 گەیشتووەتە نزیکەی 10 تریلیۆن دینار و پێشبینی دەکرێت تا کۆتایی ئەمساڵ لە 15 تریلیۆن دینار تێپەڕێت.

 

لێدوانی فەرمی: مەنار عوبەیدی، پسپۆڕی ئابووری لە لێدوانێکدا بە ئاڤا میدیای ڕاگەیاند، بانکی ناوەندیی عێراق نزیکەی 11 ملیار دۆلاری لە یەدەگی نەختینەی بیانییەکەیدا بەکارهێناوە بۆ دابینکردنی خواستی زۆر لەسەر دۆلار، ئەمەش لەکاتێکدایە نرخی نەوت لە نێوان 60-65 دۆلار بۆ هەر بەرمیلێک دابەزیوە. ئەم دابەزینە بەردەوامە مەترسی لەسەر توانای حکومەت دروست دەکات بۆ دابینکردنی بەشێکی زۆری خەرجییە کارگوزارییە سەرەکییەکان لە ساڵی داهاتوودا.

 

چارەسەرەکان: عوبەیدی جەخت دەکاتەوە کە چارەسەرێکی ڕاستەقینە پێویستە بە شیکردنەوەیەکی وردی خەرجییە گشتییەکان، ئاشکراکردنی گەندەڵیی دارایی، بەتایبەت لە مووچەی وەهمی و خانەنشینی و پڕۆگرامەکانی چاودێریی کۆمەڵایەتی. هەروەها پێویستە پێداچوونەوە بە پڕۆگرامەکانی پاڵپشتی وەک کارتی خۆراکی و پاڵپشتی دەرماندا بکرێت.

 

مەترسییە پێشبینكراوەكان: بەگوتەی عوبەیدی، عێراق ئێستا لەبەردەم وەرچەرخانێکی دارایی هەستیاردایە، بەتایبەت لەگەڵ ئەگەری دواکەوتنی پەسەندکردنی بودجەی ساڵی داهاتوو. ئەم کورتهێنانە مەترسییەکی ڕاستەقینەیە بۆ توانای دەوڵەت لە پێدانی مووچە و جێبەجێکردنی پابەندبوونەکانی. ئەگەر قەیرانەکە بە خێرایی چارەسەر نەکرێت، حکومەت ناچار دەبێت ڕێوشوێنی تووند بگرێتەبەر کە کاریگەری لەسەر هەژاران و بێکاران دەبێت پێش فەرمانبەران.