ئەنجوومەنی وەزیرانی عێراق لە کۆبوونەوەدایە و چاوەڕوان دەکرێت بڕیار لە ناردنی مووچە بدرێت

ئاڤا نیوز

ئەنجوومەنی وەزیرانی عێراق بەسەرۆکایەتیی محەممەد شیاع سوودانی، لە کۆبوونەوەدایە و چاوەڕوان دەکرێت پرسی ناردنی مووچەی مانگی 9ی فەرمانبەرانی هەرێمی کوردستان یەکلا بکرێتەوە.

 

ئەوەی پێویستە بیزانیت: هەرێمی کوردستان هەموو پابەندبوونەکانی خۆی بۆ پرسی مووچە جێبەجێ کردووە؛ لیستی مووچە نێردراوە و وردبینی تێدا تەواو بووە، هەناردەی نەوتی کوردستان بەردەوامە و داهاتی ناوخۆیی 120 ملیار دیناری مانگی نۆ ئامادەیە.

 

ڕاگەیێنراوی فەرمی: بەگوێرەی ڕاگەیێنراوی نووسینگەی ڕاگەیاندنی ئەنجوومەنی وەزیرانی عێراق، ئەمڕۆ پێنجشەممە 2025-11-13، محەممەد شیاع سوودانی، سەرۆکایەتی دانیشتنی ئاسایی ئەنجوومەنی وەزیران دەکات.

 

ئەوەی لەبارەیەوە دەگوترێت: پێشتر د.ئومێد سەباح، سەرۆکی دیوانی ئەنجوومەنی وەزیران، ڕایگەیاندبوو "هیچ بیانوویەک بۆ ناردنی مووچە نەماوە، تەرازووی پێداچوونەوە و 120 ملیارەکە ئامادەیە، هەر کات بەغدا بڕیار بدات، دەینێرین."

 

لێدوانی فەرمی: لە چاوپێکەوتنێکی تایبەتدا لەگەڵ ئاڤا، بەنگین ڕێکانی، وەزیری ئاوەدانکردنەوە و نیشتەجێکردنی حکومەتی فیدراڵی بە ئاڤای ڕایگەیاندبوو "ڕۆژی ناردنی مووچەی مانگی 9 دیاری نەکراوە، بەڵام لە نزیکترین کاتدا بڕیاری لەسەر دەدرێت." گوتیشی هیچ دوودڵییەک لەسەر مووچەی مانگەکانی 11 و 12 نییە، بەڵام مووچەی مانگەکانی 9 و 10 هێشتا جێگەی گفتوگۆیە.

 

ئەوەی چاوەڕوان دەکرێت: بەپێی زانیارییەکانی ئاڤا، پرسی مووچە لە ئەجێندای سەرەکی دانیشتنی ئەمڕۆدا نییە، بەڵام چاوەڕوان دەکرێت لە پاشکۆی کۆبوونەوەکە بڕیاری لەسەر بدرێت. ئەگەر ئەمڕۆ یەکلا نەکرایەوە، ئەوا پێشبینی دەکرێت ڕۆژی سێشەممەی داهاتووی ئەنجوومەنی وەزیران بڕیاری خەرجکردنی دەدرێت.