پۆلیس هاووڵاتییەک بە تۆمەتی ڕفاندن و وەرگەڕاندنی ئۆتۆمبێلی کاسبکارێک دەستگیر دەکات

ئاڤا نیوز

مەفرەزەکانی پۆلیسی دەربەندیخان و وارماوا تۆمەتبارێکیان دەستگیر کرد کە ئێوارەی ئەمڕۆ ئۆتۆمبێلی کاسبکارێکی ڕفاندبوو، بەڵام لە کاتی هەڵاتندا ئۆتۆمبێلەکەی وەرگەڕاند.

چیرۆکی سەرەکی: ئێوارەی ئەمڕۆ هەینی 2-1-2026، کەسێکی تەمەن 23 ساڵ کە باری دەروونیی جێگیر نییە، لە ناو قەزای دەربەندیخان ئۆتۆمبێلێکی جۆری (پیکاب - نیسان)ـی کاسبکارێکی ڕفاند. دەستبەجێ هێزەکانی پۆلیس دەستیان بە گەڕان و لێکۆڵینەوە کرد بۆ دۆزینەوەی تۆمەتبارەکە.

ئەوەی پێویستە بیزانیت: بەڕێوەبەرایەتیی پۆلیسی پارێزگای سلێمانی ڕایگەیاند: تۆمەتبارەکە لە نزیک گوندی "میرەدێ" ئۆتۆمبێلەکەی وەرگەڕاندووە، بەو هۆیەوە زیانی ماددیی زۆر بە ئۆتۆمبێلەکە و بارەکەی گەیشتووە.

- مەفرەزەکانمان توانییان تۆمەتبارەکە دەستگیر بکەن و دەست بەسەر ئۆتۆمبێلە وەرگەڕاوەکەشدا بگرن.

- تۆمەتبارەکە ناوی (د. خ. ف)ـە و لەدایکبووی ساڵی 2003ـیە. بە بڕیاری دادوەری لێکۆڵینەوەی دەربەندیخان و بەپێی ماددەی 446 لە یاسای سزادانی عێراقی ڕاگیراوە و پەڕاوی لێکۆڵینەوەی بۆ کراوەتەوە.