سەربازێکی پێشووی ئیسرائیل سوکایەتی بە میسر دەکات

ئاڤا نیوز

بڵاوبوونەوەی گرتە ڤیدیۆییەکانی سەربازێکی پێشووی سوپای ئیسرائیل لە قاهیرە کە تێیدا سوکایەتی بە گەل و وڵاتی میسر دەکات، شەپۆلێکی تووندی ناڕەزایەتی و توڕەیی لە سۆشیاڵ میدیا لێکەوتەوە.

چیرۆکی سەرەکی: ئەم ڕووداوە نەک تەنیا هەستی نەتەوەیی میسرییەکانی بریندار کردووە، بەڵکو پرسیاری جددی لەسەر ڕێکارە ئەمنییەکان دروست کردووە؛ چۆن سەربازێکی ئیسرائیلی توانیویەتی بە ناسنامەی شاراوە لەناو قووڵایی پایتەختی میسردا بسوڕێتەوە و سوکایەتی بە پیرۆزییەکانی ئەو وڵاتە بکات.

ئەوەی پێویستە بیزانیت: کەسی ناو ڤیدیۆکە: ناوی (گال ذا موشیلەر)ـە و لە ساڵی 2010 سەربازی یەکەی چەتربازانی سوپای ئیسرائیل بووە.

- موشیلەر بە ئەنقەست وێنەی ناوچە هەژارنشینەکانی گرتووە و میسری بە "هیندی موسڵمانان" ناوبردووە؛ هەروەها تەوقەکردن لەگەڵ هاووڵاتییەکی میسری بە "قێزەون" وەسف دەکات.

- ڤیدیۆکانی لەناو گەڕەکە میللییەکان، قەڵای سەڵاحەددینی ئەییوبی و ئەهرامەکانی جیزە تۆمار کردووە.

چۆن چووەتە میسر؟: موشیلەر دوای گەڕانەوەی بۆ ئیسرائیل ئاشکرای کردووە کە لە ڕێگەی سنووری ئوردن و بە بەکارهێنانی پاسپۆرتێکی ئەوروپی چووەتە ناو میسر. بۆ ئەوەی دەستگیر نەکرێت، خۆی وەک گەشتیارێکی پورتوگالی ناساندووە و پاسپۆرتە ئیسرائیلییەکەی لەناو پێڵاوەکەیدا شاردووەتەوە.

باکگراوند: ئەم ئاڵۆزییە لە کاتێکدایە کە پەیوەندییەکانی نێوان گەلی میسر و ئیسرائیل بەهۆی بارودۆخی ناوچەکە هەمیشە لەبارێکی هەستیاردا بووە. بڵاوبوونەوەی ڤیدیۆکانی ئەم سەربازە، فشارێکی زۆری خستووەتە سەر لایەنە پەیوەندیدارەکانی میسر بۆ ڕوونکردنەوەی چۆنیەتی هاتنەژوورەوەی ئەو کەسە.