ئەم هەفتەیە نزیکەی 100 هەزار گەشتیار سەردانی هەولێر و دهۆکیان کردووە

ئاڤا نیوز

 

لە ماوەی کەمتر لە هەشت ڕۆژ نزیکەی 100 هەزار گەشتیار بۆ بەسەربردنی پشووی سەری ساڵ سەردانی هەولێر و دهۆکیان کردووە.

 

چیرۆکی سەرەکی: سەرچاوەیەکی تایبەت بە ئاڤای گوت: لە26-12-2025 تاوەکو 1-1-2026 ، بۆ بەسەر بردنی پشووی سەری ساڵ، 98 هەزار و 854 چوار گەشتیار لە ناوەڕاست و باشووری عێراقەوە سەردانی هەولێر و دهۆکیان کردووە.

 

ڕێکارە هاوکارەکان: بە هەماهەنگی نێوان لایەنە پەیوەندیدارەکان ڕێکاری تایبەت گیراوەتەبەر بۆ پێشوازی لەو گەشتیارانەی لە باشوور و ناوەڕاستی عێراق ڕوو لە هەرێمی کوردستان دەکەن، لە ماوەی چەند خولەکێک لەلایەن ئاسایشی بازگەکان کارتی دڵنیاییان بۆ دروست دەکرێت و کارئاسانی تەواویان بۆ دەکرێت.

 

کاریگەریی و لێکەوتەکان: لایەنێکی گرنگی کارنامەی کابینەی نۆیەمی حکومەتی هەرێم، کارکردنە بۆ بووژاندنەوە و پەرەپێدانی کەرتی گەشتیاریی لە هەرێمی کوردستاندا، بۆ ئەو مەبەستە باشکردنی ڕێگا و بان و بونیادنانی ژێرخانی گەشتیاریی لە هەرێمی کوردستان و هاوکارییکردنی کۆمپانیا وەبەرهێنەکان لەو کەرتەدا بۆ ئاسانکارییکردن بۆ گەشتیاران، لەو خاڵە گرنگانەن کە هۆکاری بووژاندنەوەی کەرتەکەن بەتایبەتی لەبواری گەشتیاریی زستانەدا.

 

لەلایەکی دیکەوە: هەموو بنکە و شوێنە گەشتیارییەکان لە کراوەن و لەلایەن ئیدارەی پارێزگا و ئیدارە سەربەخۆکان و گەشتوگوزارەوە بەردەوام چاودێریان دەکرێت بۆ ئەوەی بە باشترین شێوە پێشوازی لە گەشتیاران بکەن.

 

باکگراوند: ئەمساڵ جیا لەوەی چەندین چالاکی و ئاهەنگ و فێستیڤاڵ بەبۆنەی سەری ساڵەوە ئەنجام دراون، هاوکات بارینی بڕێکی زۆر بەفر وایکردووە ژمارەیەکی زۆر گەشتیاری باشوور و ناوەڕاستی عێراق بۆ بەسەر بردنی پشووی سەری ساڵ ڕوو لە هەرێمی کوردستان بکەن.