وەقفی سوننەی عێراق سبەی نەکردە جەژن و کوردستانیش ڕوونکردنەوەی هەیە

ئاڤا نیوز

وەقفی سوننەی عێراق سبەی یەکشەممەی نەکردە جەژن، وەزارەتی ئەوقافی کوردستانیش ڕایدەگەیێنێ، بڕیارەکەی وەقفی سوننی کاریگەری لەسەر بڕیارەکەی ئەوان نابێت و سبەی لە هەرێمی کوردستان جەژنە.

چیرۆکی سەرەکی: لە تۆڕە کۆمەڵایەتییەکان وا بڵاوکراوەتەوە وەقفی سوننەی عێراق پەشیمان بووەتە لەوەی سبەی بکاتە جەژن، بەڵام ئەمڕۆ بەهیچ جۆرێک ڕاگەیێنراوی وای نەبووە، تەنیا یەک ڕاگەیێنراوی فەرمی بڵاوکردووەتەوە و بەڕوونی دەڵێت سبەی تەواوکەری مانگی ڕەمەزانە و دووشەممە جەژنە، تەنیا لیژنەی فەتوای سوننە (دار الافتاء) سبەی کردبووە جەژن.

زانیاریی زیاتر: زۆربەی شیعەکانی عێراق هاوشێوەی ئێران سبەیان نەکردووەتەوە جەژن، تەنیا مەرجەعێکی شیعەکان نەبێت بە ناوی کەمال حەیدەری کە یەکشەممەی بە ڕۆژی یەکەمی جەژن دیاری کردووە.

کاریگەری و لێکەوتەکان: لیژنەی بینینی مانگ لە هەرێمی کوردستان بەفەرمی سبەی کردووەتە جەژن. لەبارەی ئەوەش ئایا بڕیاری وەقفی سوننی هیچ کاریگەرییەکی لەسەر هەرێمی کوردستان دەبێت؟ نەبەز ئیسماعیل، گوتەبێژی وەزەتی ئەوقاف بە ئاڤای گوت: "نەخێر هیچ کاریگەرییەکی نابێت، بڕیاری کۆتایی لای حکومەتی کوردستانە و سبەی جەژنە".