ئیدارەی خۆسەر حکومەتی نوێی دیمەشق ڕەتدەکاتەوە

 

ئاڤا نیوز

ئیدارەی خۆسەر لە باکوور و ڕۆژهەڵاتی سووریا پێکهێنانی حکومەتی نوێی دیمەشق ڕەتدەکاتەوە و داوای حکومەتێکی گشتگیر دەکات کە نوێنەرایەتی فرەچەشنی گەلی سووریا بکات.

چیرۆکی سەرەکی: درەنگانی شەوی 2025-03-29، بەسەرپەرشتیی ئەحمەد شەرع، سەرۆککۆماری سووریا بۆ قۆناغی ڕاگوزەر، حکومەتی نوێی ڕاگوزەری سووریا ڕاگەیێنرا و کابینەکە تەنیا یەک ئافرەتی تێدایە.

کاریگەریی و لێکەوتەکان: ئیدارەی خۆسەر حکومەتی نوێی دیمەشقی بە ڕژێمی پێشوو دەچووێنێت و جەخت لەوە دەکاتەوە هەر بڕیارێک بەبێ بەشداری ئەوان دەربچێت پەیوەندی بەوانەوە نییە و داوای کۆتاییهێنان بە سیاسەتەکانی وەدەرنان و پەراوێزخستن دەکات و بە پێویستی دەزانێت حکومەتێک بێت کە هەموو سوورییەکان بەبێ گوێدانە مەزهەب و ئایین و نەتەوەکانیان لەخۆ بگرێت.

ڕاگەیێنراوی فەرمی: ئیدارەی خۆسەر لە باکوور و ڕۆژهەڵاتی سووریا لە ڕاگەیێنراوێکدا ئاماژەی بەوەکردووە کە حکومەتەکە ڕەنگدانەوەی ئەو فرەچەشنی و فرەیییە نییە کە لە کۆمەڵگەی سووریادا هەیە و دەڵێت: "لەماوەی چەند هەفتە و چەند مانگی ڕابردوودا، سوورییەکان بە تامەزرۆییەوە چاوەڕێی پێکهێنانی حکومەتێکی نیشتمانیی گشتگیر بوون. بەڵام ئەو حکومەتەی ڕایگەیاندووە، بەشێوەیەکی سەرنجڕاکێش هاوشێوەی حکومەتی پێش خۆی بووە، نەیتوانیوە هەمەجۆریی سووریا لەبەرچاو بگرێت و بەردەوامیش بووە لە هەژموونی لایەنێک".

ئەو مانایەی دەیگەیێنێت: ئیدارەی خۆسەر ئاماژە بۆ ئەوەش دەکات، ئەو سیاسەتانەی دەسەڵاتدارانی دیمەشق پەیڕەوی دەکەن، وڵات دەبەنەوە بۆ چوارگۆشەی یەکەم، کە حوکمڕانی لە ناوەنددا دەمێنێتەوە و پرۆسەی سیاسی نوێنەرایەتی ڕاستەقینەی هەموو پێکهاتەکانی گەلی سوریا ناکات.

ئەوەی پێشبینی دەكرێت: ئیدارەی خۆسەر جەخت لەوە دەکاتەوە هەر حکومەتێک ڕەنگدانەوەی ئەم فرەچەشنییە نەبێت، ناتوانێت وڵات بە باشی بەڕێوەببات، بەڵکو قەیرانەکانی ئێستا قووڵتر دەکاتەوە.

چارەسەرەکان: ئیدارەی خۆسەر داوای کۆتاییهێنان بە سیاسەتەکانی وەدەرنان و پەراوێزخستن و هەنگاونان بەرەو لەخۆگرتنی هەموو سوورییەکان بەبێ گوێدانە مەزهەب و ئایین و نەتەوەکانیان دەکات.

داواکاری فەرمی: ئیدارەی خۆسەر لە کۆتایی ڕاگەیێنراوەکە جەخت لەسەر داواکارییە بنەڕەتییەکانی سوورییەکان دەکاتەوە، لە بوونیادنانی سووریایەکی دیموکراتی، لامەرکەزی، کە مافەکانی هاووڵاتیان و بەشدارییەکی دادپەروەرانە لە ژیانی سیاسیدا مسۆگەر بکات.