پارێزگاری هەولێر: شەو و ڕۆژ بازگەکان بۆ گرووپە گەشتیارییەکان کراوە دەبن

ئاڤا نیوز

پارێزگاری هەولێر، بۆ جەژنانە هێزە ئەمنییەکانی ناو شاری هەولێری بەسەرکردەوە. بۆ ڕۆژنامەنووسان قسەی کرد و وتی، شەو و ڕۆژ 24 کاتژمێر بازگەکان کراو دەبن بۆ پێشوازی لە گرووپە گەشتیارییەکان.

وێنە گەورەکە: ساڵانە بەر لە بۆنەکان، وەزارەتی ناوخۆی حکومەتی هەرێمی کوردستان چەندین پلان بۆ ئامادەکاری دادەنێت، ئەمساڵیش بە بۆنەی جەژنی ڕەمەزان پلان دانراوە بۆ پێشوازی لە ژمارەیەکی زۆری گەشتیار.

لێدوانی فەرمی: ئومێد خۆشناو، پارێزگاری هەولێر لە یەکەم شەوی جەژنی ڕەمەزان لەناو بازاڕی شاری هەولێر بە مەبەستی جەژنانە سەردانی هێزە ئەمنییەکانی کرد. لە کۆنگرەیەکی ڕۆژنامەوانی ڕایگەیاند: چاوەڕوان دەکرێت ئەمساڵ ژمارەیەکی زۆرتری گەشتیار ڕوو لە شاری هەولێر بکەن، ساڵانە تەنیا تا 12ـی شەو پێشوازی لە گروپە گەشتیارییەکان دەکرا، بەڵام ئەمساڵ تیم دانراوە 24 کاتژمێر بازگەکان کراوەن.

پارێزگاری هەولێر ئەمانەشی وت:

برایانی پۆلیس، ئاسایش، پۆلیسی هاتووچۆ و بەرگری شارستانی هۆکاری ئەو ئارامییەی هەولێرن و ئەوان بەم جەژنە لە ئەرکدان.

دیاریکردنی ئەمڕۆ وەک یەکەم ڕۆژی جەژنی ڕەمەزان لە هەرێمی کوردستان بنەمایەکی شەرعی هەبوو، بڕیارێکی دروست بوو.

لە شارەکانی عێراق شارێک کردوویەتی بە جەژن و شارێکی دیکە نەیکردووە، ئەمە ناکۆکی مەزهەبییە.