وەزیری ناوخۆی هەرێمی كوردستان لە بەریتانیا بەشداری لە لوتكەی ئاسایشی سنوور دەكات

ئاڤا نیوز

 

لەسەر داوەتنامەی فەرمیی وەزارەتی ناوخۆی حکومەتی بەریتانیا، وەزیری ناوخۆی حکومەتی هەرێمی کوردستان گەیشتە بەریتانیا، بۆ بەشداریکردن لە لوتکەی ئاسایشی سنوور کە وەزیرانی ناوخۆ و داد و بەرپرسانی ئاسایشی سنووری ژمارەیەکی زۆری وڵاتان بەشداری دەکەن.

 

وێنە گەورەكە: ئەمڕۆ دووشەممە 31-3-2025، لوتكەی ئاسایشی سنوور بەفەرمی دەست بەكارەكانی دەكات و دوو ڕۆژ دەخایێنێت، بۆ ئەم مەبەستەش ئێوارەی ڕۆژی یەكشەممە، ڕێبەر ئەحمەد، وەزیری ناوخۆی هەرێمی كوردستان بە بانگهێشتنامەی فەرمی گەیشتە بەریتانیا بەیاوەری وەزیری ناوخۆی حكومەتی فیدڕاڵی عێراق، لەڕێورەسمی پێشوازیدا، چاوی كەوت بە خاتوو ییڤیت كوپەر، وەزیری ناوخۆی بەریتانیا و ژمارەیەك وەزیرانی داد و ناوخۆی وڵاتان.

 

لێدوانی فەرمی: هێمن میرانی، بەڕێوەبەری گشتیی دیوانی وەزارەتی ناوخۆ ڕایگەیاند، لەمەڕاسیمی پێشوازیدا، وەزیری ناوخۆی هەرێمی كوردستان چاوی كەوتووە بە وەزیری ناوخۆی ئەڵمانیا، وەزیری کۆچی هۆڵەندا، وەزیری دادی سوید، وەزیری کۆچی چین، وەزیری ناوخۆی بولگاریا،  ژمارەیەک وەزیر و  بەرپرسانی پایەبەرزی سنوور و ئاسایشی وڵاتانی دیکە.

 

ئەوەی پێویستە بیزانیت: ئەمڕۆ لەدەستپێكی لوتکەی ئاسایشی سنوور، کییر ستارمەر، سەرۆکوەزیرانی بەریتانیا، وتاری کردنەوەی لوتکە پێشکەش دەکات و دواتر بەرنامەکانی لوتکە دەست پێدەکات. بڕیارە لە پەنێڵی یەکەمدا کە وەزیری ناوخۆی بەریتانیا سەرپەرشتی دەکات، رێبەر ئەحمەد یەکێکە لە پانێلیستەکان و وتارێک پێشکەش بکات.