ڕێبەر ئەحمەد لەگەڵ هاوتا فەرەنسییەكەی پرسە ئەمنییەكان تاوتوێ دەكەن

ئاڤا نیوز

وەزیری ناوخۆی هەرێمی كوردستان لەگەڵ هاوتا فەرەنسییەكەی، پرسە ئەمنییە هاوبەشەكان تاوتوێ دەكەن و دووپات لە پەرەپێدانی دۆستایەتیی مێژوویی نێوان فەرەنسا و هەرێمی كوردستان دەكەنەوە.

وێنە گەورەكە: ئەمڕۆ دووشەممە لە پەراوێزی بەشداریكردنی لوتكەی ئاسایشی سنوور كە لە بەریتانیا بەڕێوەدەچێت، ڕێبەر ئەحمەد، وەزیری ناوخۆی حکومەتی هەرێمی کوردستان، لەگەڵ بغونو ڕیتالیو، وەزیری ناوخۆی فەرەنسا کۆبووەوە.

ڕاگەیێنراوی فەرمی: وەزارەتی ناوخۆی هەرێمی كوردستان بڵاویكردووەتەوە، ڕێبەر ئەحمەد سوپاسگوازاریی حکومەت و هاووڵاتییانی هەرێمی کوردستانی پێشکەشی وەزیری ناوخۆی فەرەنسا کرد بۆ پەیوەندی مێژوویی و پاڵپشتیی بەردەوامی وڵاتی فەرەنسا لە دۆزی ڕەوای گەلی كورد لە قۆناغە جیاجیاکانی مێژوودا. هەروەها باسی لە پاڵپشتیی گرنگی فەرەنسا کرد بۆ هێزی پێشمەرگەی کوردستان لە ڕووبەڕووبوونەوەی تیرۆریستانی داعشدا.

لەلایەكی دیكەوە: وەزیری ناوخۆی فەرەنسا خۆشحاڵیی خۆی بەم دیدارە دەربڕی و پاڵپشتیی حکومەت و خەڵکی فەرەنسای بۆ هەرێمی کوردستان دووپات کردەوە و ڕۆڵی گرنگی هەرێمی کوردستانی لە شەڕی داعش و تیرۆریستان و لەناوبردنی تۆڕەکانی تاوان، بەرز نرخاند.