سۆسیال دیموکرات: بەشداریكردنمان لە حكومەت ئەگەرێكی بەهێزە

ئاڤا نیوز

گوتەبێژی پارتی سۆسیال دیموكراتی كوردستان دەڵێت، بەشداریكردنمان لە كابینەی 10ی حكومەتی هەرێمی كوردستان ئەگەرێكی بەهێزە و باس لەوەش دەكات كە حزبەكە دەیەوێت وەزارەتێكی خزمەتگوزاری وەربگرێت.

وێنە گەورەكە: دوای ئەوەی هەردوو لایەنی سەرەكیی پێكهێنانی حكومەت كە پارتی و یەكێتین دەگەنە ڕێككەوتن، سەردانیكردنی بۆ لای حزب و لایەنە سیاسییەكانی دیكە دەستپێدەكات سەبارەت بە بەشداریكردن یان نەكردنیان لە حكومەت و خواست و ویستەكانیان بۆ كابینەی تازە، لە ئێستاوە بەشێكیان خۆیان یەكلاكردووەتەوە بۆ بەشدارینەكردن و بەشەكەی دیكەشیان پێشەكی ڕایانگەیاندووە كە بەشدار دەبن، بەڵام بە مەرج و داواكاریی خۆیان.

لێدوانی فەرمی: فەرهاد تۆفیق، گوتەبێژی پارتی سۆسیال دیموكراتی كوردستان بە ئاڤا میدیای ڕاگەیاند: دوای ئەوەی ڕێكارەكانی پێكهێنانی كابینەی تازەی حكومەت لە پەرلەمانی كوردستان ئەنجام دران، ئینجا سەردانە فەرمییەكانی لایەنی سەرەكیی حكومەت بۆ لای لایەنە سیاسییەكان دەستپێدەكات و ئەوكاتە كاتی ئەوە دەبێت كە لایەنەكان بڵێن بەشدار یان بەشدار نابن لە حكومەت و خواست و داواكارییەكانی خۆیان دەخەنەڕوو، بەڵام بۆ ئێمە بەشداریكردنمان لە كابینەی تازەی حكومەتی هەرێمی كوردستان ئەگەرێكی بەهێزە.

- ئەوەی بۆ ئێمە گرنگە ئەوەیە كە حكومەتێكی خزمەتگوزار و لە ئاست ویست و خواستی خەڵكی كوردستاندا بێت، هاوكات بەرنامەیەكی تۆكمەی بەهێزی هەبێت بۆ ئاستی ئەو گوشارانەی لە ناوخۆ و دەرەوەی عێراق كە دەخرێنە سەر هەرێمی كوردستان، ئێمە هەمیشە ڕامانگەیاندووە ئەگەر بەشداربین یاخود نا، حكومەتی هەرێمی كوردستان بە حكومەتی خۆمان دەزانین، لەبەر ئەوەی ئێمە خوێنمان بۆی ڕشتووە.

- دوای ئەوەی شاندی فەرمی دێتە لامان بۆ بابەتی پێكهێنانی حكومەت، ئێمە بەرنامەی خۆمانمان هەیە و بۆ ئێمە خزمەتكردنی خەڵك گرنگە، بۆیە داوای ئێمە ئەوەیە كە وەزارەتێكی خزمەتگوزاری لە كابینەی 10ی حكومەت وەربگرین.

ئەوەی پێویستە بیزانیت: پارتی سۆسیال دیموكراتی كوردستان لە كابینەی نۆیەمی حكومەتی هەرێمی كوردستان پۆستی وەزیری كاروباری شەهیدان و ئەنفالكراوانی پێدرابوو، لە دوایین هەڵبژاردنی پەرلەمانی كوردستانیش توانی كورسییەكی پەرلەمان بەدەستبێنێت و پێشبینی دەكرێت لە كابینەی تازەش جارێكی دیكە پۆستی وەزارەتێكی پێ بدرێت.