لە ڕۆژانی داهاتوو پارتی و یەكێتی  جارێكی دیكە لە ئاستی باڵا كۆدەبنەوە

ئاڤا نیوز

وا چاوەڕوان دەكرێت لە چەند ڕۆژی داهاتوودا جارێكی دیكە پارتی دیموكراتی كوردستان و یەكێتیی نیشتمانی كوردستان لە ئاستی باڵا كۆببنەوە، بەپێی زانیارییەكانیش لە كۆبوونەوەی ئەمجارە باس لە دابەشكردنی پۆستەكان دەكرێت.

وێنە گەورەكە: پارتی و یەكێتی وەك یەكەم و دووەمی  دوایین هەڵبژاردنی پەرلەمانی كوردستان لە كۆبوونەوەكانیان بۆ پێكهێنانی كابینەی 10ی حكومەتی هەرێمی كوردستان بە سەرۆكایەتیی سەرۆكوەزیران مەسرور بارزانی بەردەوامە و جگە لە شاندی دانوستاندنكاری هەردوولا، دوو كۆبوونەوەی لووتكەش لەنێوان سەرۆكوەزیران مەسرور بارزانی و بافڵ تاڵەبانیش كراوە و بەپێی گوتەی بەرپرسانی هەردوولا؛ پێكهێنانی كابینەكە نزیكە.

زانیاریی بەدەستهاتوو: شاندی دانوستاندنكاری پارتی و یەكێتی تاوەكو ئێستا چەند جارێك كۆبوونەتەوە و دوایین كۆبوونەوەشیان لە 18ی مانگی ڕابردوو بوو، ئەوكات هەردوولا ڕایانگەیاند كە گەیشتوونەتە دوا ڕەشنووسی دیدگای هاوبەش بۆ قۆناغی داهاتوو کە دەبێتە ئامرازێک بۆ پێکهێنانی حکومەت و دامەزراوەکانی تر.

زانیاریی تایبەت: پارتی و یەكێتی لەسەر 90%ی پرسەکان ڕێککەوتوون، لە ڕۆژانی داهاتوو، کۆبوونەوەیەکی دیکە لە ئاستی باڵای هەردوو حیزب دەكرێت و ئەو 10%یەی كە ماوە ڕێککەوتنی لەسەر دەکرێت.

ئەوەی پێویستە بیزانیت: پێشووتر، سەعدی پیرە، گوتەبێژی یەکێتی  بە میدیای حیزبەكەی ڕاگەیاند، پەیوەندییەكانی نێوان پارتی و یەكێتی هەر باش بووە، ئەوان دوو هێزی ڕکابەری یەكترن لە حكومڕانیی هەرێمی كوردستاندا، لەكاتی هەڵبژاردن هەر یەكێكیان هەوڵ دەدەن بەرنامەی خۆیان بخەنەڕوو، بەڵام ئێستا كاتی گفتوگۆیە، بەهۆی ئەوەی پارتی و یەکێتی هیچ كامێكیان زۆرینەی ڕەها نین، بۆیە دەبێت بەیەكەوە حكومەت پێكبهێنن.

- سەبارەت بە دابەشکرندی پۆستەکانیش گوتی، تاوەكو ئێستا یەكلانەكراونەتەوە، بەڵام ئەوەی كە یەكلاكراوەتەوە بابەتی هاوبەشی و جۆری هاوبەشییەكەیە.