هەرێمی كوردستان لە شەوێكدا توانای لەخۆگرتنی 100 هەزار گەشتیاری هەیە

ئاڤا نیوز

گوتەبێژی دەستەی گەشتوگوزاری هەرێمی كوردستان باس لە پێشكەوتنە چەندی و چۆنییەكانی كەرتی گەشتیاری دەكات لە هەرێمی كوردستان و دەڵێت لە شەوێكدا هەرێمی كوردستان توانای هەیە 100 هەزار گەشتیار لەخۆ بگرێت.

وێنە گەورەکە: گەشتوگوزار بۆ هەرێمی کوردستان سەرەڕای بایەخە ئابوورییەکەی، هاوکات ڕەهەندێکی نیشتمانیشی هەیە و ئامرازێکی بەهێزە بۆ ئاشناکردنی گەشتیاران بە مێژوو، شوناس، فەرهەنگ و کولتووری کوردستان.

لێدوانی فەرمی: ئیبراهیم عەبدولمەجید، گوتەبێژی دەستەی گشتیی گەشتوگوزار بە ئاڤا میدیای ڕاگەیاند:

٠ كەرتی گەشتوگوزار لە سەردەمی كابینەی نۆیەمدا پێشكەوتنی زۆر گەورەی بەخۆیەوە بینیوە، پێشكەوتنەكە لە ڕووی چەندایەتی و چۆنایەتییە، ئێستا هەرێمی كوردستان لە شەوێكدا توانای لەخۆگرتنی نزیكەی 100 هەزار گەشتیاری هەیە، هەرێمی كوردستان خاوەنی 480 هۆتێل و 282 مۆتێل و هەزار ڕێستورانت و چێشتخانە و 700 كافتریا و 44 كۆمەڵگەی گەشتیاری و 500 كۆمپانیا و نووسینگەی گەشتیارییە.

٠ لە ڕووی چەندایەتییە و هەرێمی كوردستان چەندە پێشكەوتووە، هاوكات لە ڕووی چۆنایەتیشەوە زۆر پێشكەوتووە، ئێستا لە هەرێمی كوردستان نزیكەی 40 بنكە و شوێنی گەشتیاریی بڕاندی پێنج ئەستێرەیی هەن، كە كاریگەریی زۆر باشی هەبووە لەسەر بەرزكردنەوەی خزمەتگوزارییە گەشتیارییەكان.