گۆڕان سکاڵای یاسایی لەسەر سەرۆکی ئەنجوومەنی کۆمسیارانی عێراق تۆمار دەکات

 

ئاڤا نیوز

گۆڕانی گردی زەرگەتە ئەمرۆ سێیەمین کۆنفڕانسیان بەست، تێیدا ئەندامانی جڤاتی نیشتمانی هەڵبژێردران و  بەرنامەی سیاسی و دەستووری ناوخۆیی پەسەند کران. گۆڕانی گەڕەکی کوردساتیش بە نیازە رۆژی پێنجشەممە کۆنفڕانس ببەستێت.

چیرۆکی سەرەکی: گۆڕانی گردی زەرگەتە کۆنفڕانسی سێیەمی بە بێ ئامادەبوونی ئەنجوومەنی کۆمسیارانی عێراق بەست، لە کاتێکدا پێشتر ئاگادار کرابوونەوە بۆ ئەوەی سەرپەرشتی کۆنفڕانسەکە بکەن.

چی ڕوویدا: هەموو میدیاکان ڕووماڵی کۆنفڕانسەکەیان کرد و بۆیان هەبوو بچنە گردەکە، تەنیا KNN نەبێ، کە ساڵانێک پێیان دەوت تۆپخانەکەی گۆڕان، کەچی ئەمرۆ لەکاتی کۆنفڕانسەکەی گۆڕانی گردی زەرگەتە، دیمەنی تەرزە بارینی پیشان دەدا.

بۆچوونی لایەنی بەرامبەر: كاردۆ محەمەد، ئەندامی جڤاتی نیشتمانی بزووتنەوەی گۆڕانی گەڕەکی کوردسات دەڵێت: ئێمە رۆژی پێنجشەممە کۆنفڕانس دەبەستین خۆمان نوێ دەکەینەوە، گۆڕان دەبەینە قۆناغێکی تازەوە.

لێدوانی فەرمی: دانا عەبدولکەریم تاکە وەزیری گۆڕان بوو، بەشداری کۆنفڕانسەکەی کرد و گوتی، نوێنەری کۆمسیۆنی هەڵبژاردنەکان لەژێر گوشاری سیاسی نەهاتووە بۆ کۆنفرانسەکەی ئێمەو چاودێری بارودۆخەکە بکات.

زانیاریی زیاتر: ناوی ژمارەیەک کەس بڵاو بوویەوە کە وەکو ئەندامی جڤاتی نیشتمانی گۆڕان هەڵبژێردران، یەکێکیان محەمەد تۆفیق ڕەحیمە. ئاڤا پەیوەندی بە ناوبراو کرد، لە وەڵامدا بێ ئاگایی خۆی لەو بابەتە ڕاگەیاند و گوتی، لەو لیستە ناوی منیان داناوەو بۆ هیچ پۆستێکیش خۆم کاندید نەکردووە.

لە لایەکی دیکەوە: ئێوارەی ئەمڕۆ، یاسین حەمە عەلی، ڕێکخەری ژووری هەڵبژاردنی بزووتنەوەی گۆڕان لە کۆنگرەیەکی ڕۆژنامەوانیدا ڕایگەیاند: هەرچەندە پێشتر ئەنجوومەنەکەیان ئاگادارکردبووە و داوایان کردبوو نوێنەریان سەرپەرشتی کۆنفڕانسەکە بکات، بەڵام نەهاتوون و خۆیان هەڵقورتاوەتە ناو کێشە ناوخۆییەکانی بزووتنەوەکە، لەبەر ئەوە سکاڵای یاسایی لەسەر سەرۆکی ئەنجوومەنی کۆمسیارانی عێراق تۆماردەکەین و پێویستە سنوورێک بۆ ئەو تاکڕەوییە لە بڕیاردانی بۆ دابنرێت.