تورکیا ئەفسەرێکی پێشووی وەزارەتی ناوخۆ ڕادەستی عێراق دەکاتەوە

ئاڤا نیوز


دەسەڵاتدارانی تورکیا ئەفسەرێکی پێشووی وەزارەتی ناوخۆی عێراق کە تۆمەتبارە بە ڕێگەخۆشکردن بۆ هەڵاتنی دەستبەسەرکراوێک لە زیندان، ڕادەستی عێراق دەکاتەوە.

ئەوەی پێویستە بیزانیت: ئەو تۆمەتبارە هەڵاتووە، وەک ئەفسەر لە بنکەیەکی پۆلیسدا کاری کردووە و پۆستەکەی بە خراپ بەکارهێناوە، لەسەر ئەم تۆمەتەش دادگای تاوانەکان لە سەرۆکایەتی دادگای تێهەڵچوونەوەی بەغدا، بە غیابی سزای 10 ساڵ زیندانی بۆ دەرکردبوو.

ڕاگەیێنراوی فەرمی: بەگوێرەی ڕاگەیێنراوی دەستەی دەستپاکی فیدراڵیی عێراق، سەرکەوتووبین لە گەڕاندنەوەی تۆمەتباری هەڵاتوو "خەلیل نووری خەلیل عەجیل عەزاوی" لە وڵاتی تورکیاوە، کە بە تاوانی بە قاچاخبردنی دەستبەسەرکراوێک سزا درابوو.

شێوازی جێبەجێکردن: ڕێککارەکان و بەدواداچوونەکان، لەگەڵ هەوڵەکانی ئەنجوومەنی باڵای دادوەری-سەرۆکایەتی داواکاری گشتی، دەزگای هەواڵگری، بەڕێوەبەرایەتی پۆلیسی عەرەبی و نێودەوڵەتی لە وەزارەتی ناوخۆ، بووە هۆی ڕادەستکردنەوەی سزادراوی هەڵاتوو لە دەسەڵاتدارانی تورکیا.