ئێران نامەیەک ئاراستەی نەتەوەیەکگرتووەکان دەکات

ئاڤا نیوز

وەزیری دەرەوەی ئێران، نامەیەکی پێشکەش بە ئەنتۆنیۆ گۆتێرێس، سکرتێری گشتیی نەتەوەیەکگرتووەکان کرد و تیایدا داوای کردووە ئەمریکا قەرەبووی زیانەکانی جەنگی 12ی ڕۆژەی لەگەڵ ئیسرائیل بکاتەوە.

چیڕۆکی سەرەکی: ئێران و ئیسرائیل لە مانگی حویزەیرانی ئەمساڵ بۆ ماوەی 12 ڕۆژ لەجەنگدا بوون، ئیسرائیل بەشێوەیەکی بەرفراوان هێرشی بۆ سەر ئێران ئەنجامدا، کە بەهۆیەوە چەندین بەرپرسی باڵای سەربازی و زانای ئەتۆمی وڵاتەکەی کردە ئامانج و دواتر دۆناڵد ترەمپ، سەرۆکی ئەمریکا توانی ئاگربەست لەنێوانیان ڕابگەیێنێت.

زانیاریی بەدەستهاتوو: دەقی نامەکەی عێراقچی لەلایەن وەزارەتی دەرەوەی ئێران بڵاوکراوەتەوە و تێیدا هاتووە، "لە 6ی تشرینی دووەمی 2025، سەرۆکی ئەمریکا ڕایگەیاند، ئیسرائیل هێرشی کردە سەر ئێران، هێرشێکی زۆر زۆر بەهێز بوو، من بە تەواوی بەرپرسیار بووم لێی، بەپێی یاسا نێودەوڵەتییەکان، ئەم لێدوانانە بەڵگەی ئاشکران لەسەر ئاراستەکردن و کۆنترۆڵکردنی ئەمریکا بەسەر ئەو کردەوە نایاساییانە''.

زانیاریی زیاتر: عێراقچی نووسیوویەتی، ئەم هێرشانە پشتگوێخستنی تەواوی بنەماکانی یاسای نێودەوڵەتییەکان بوون جیا لە کوژرانی زیاتر سەدان کەس،  ژێرخانی وڵاتەکەش بە ئامانج گیرا، لەوانەش دامەزراوە ئەتۆمییە ئاشتیخوازانەکانمان. 

کاریگەری و لێکەوتەکان: عێراقچی، داوا دەکات "بە پشتبەستن بەو خاڵانەی کە باس کران، ئەرکی سەرشانی ئەمریکایە قەرەبووی سەرجەم زیانەکان بکات دەشڵێت: ئێران چاوەڕوانە کە سکرتێری گشتیی نەتەوەیەکگرتووەکان و ئەنجوومەنی ئاسایش، بەگوێرەی بەرپرسیارییەتییان بەرامبەر پاراستنی ئاشتی و ئاسایشی نێودەوڵەتی، ڕێوشوێنی پێویست بگرنەبەر بە ئامانجی دڵنیابوون لە لێپرسینەوەی ئەمریکا و ئیسرائیل.''