مەسرور بارزانی و وەزیری دەرەوەی فەرەنسا دۆخی ڕۆژئاوای کوردستان تاوتوێ دەکەن

ئاڤا نیوز

لە پەراوێزی کۆڕبەندی ئابووریی داڤۆس، سەرۆکوەزیران، مەسرور بارزانی و ژان نوێل بارۆ، وەزیری دەرەوەى فەرەنسا، دۆخی گشتیی و دوایین گۆڕانکارییەکانی عێراق و گفتوگۆی لایەنە سیاسییەکانیان بۆ پێکهێنانی کابینەی نوێ تاوتوێ کرد.

چیرۆکی سەرەکی: ئەمڕۆ پێنجشەممە، سەرۆکوەزیران، مەسرور بارزانی، لە داڤۆس پێشوازی لە ژان نوێل بارۆ، وەزیری دەرەوەى فەرەنسا کرد، لە دیدارێکدا، پەیوەندییەکانی نێوان هەرێمی کوردستان و وڵاتی فەرەنسا و بارودۆخی ناوچەکە و هەڕەشەکانی سەر سەقامگیری گفتوگۆیان لە بارەوە کرا.

ڕاگەیێنراوی فەرمی: سەرۆکایەتی حکومەتی هەرێمی کوردستان ڕایگەیاند، کۆبوونەوەکە، تایبەت بوو بە شەڕ و پەرەسەندنی سەربازی سووریا، هەردوولا نیگەرانی قووڵی خۆیان بەرامبەر شەڕ و پێکدادانەکان دەربڕی کە هەڕەشەیەکی جددیە بۆ سەر ئاشتی و سەقامگیریی ناوچەکە و مەترسی بەهێزبوونەوەی تیرۆریستانی داعشی لێ دەکەوێتەوە، هەردوولا هاوڕابوون لە سەر چارەسەرکردنی کێشەکان لە ڕێگەی گفتوگۆ و دانوستان و گەرەنتیکردنی مافەکانی گەلی گورد و گشت پێکهاتەکان.

وەزیری دەرەوەی فەرەنسا، سڵاو و ڕێزی ئیمانوێل ماکڕۆن، سەرۆکی فەرەنسای بە سەرۆکوەزیران، مەسرور بارزانی گەیاند و جەختی لە برەودانی زیاتر بە دۆستایەتیی و پەیوەندیی لەمێژینەی نێوان هەرێمی کوردستان و فەرەنسا کرد.

لای خۆیەوە سەرۆکوەزیران، سوپاس و پيزانینی هەرێمی کوردستانی بۆ پشتیوانیی بەردەوامی حکومەت و گەلی فەرەنسا دووپات کردەوە.