ئیسپانیا 1 ملیۆن یۆرۆ بۆ ئاوارەکان تەرخان دەکات

ئاڤا نیوز

ئیسپانیا و بەرنامەی گەشەپێدانی نەتەوە یەکگرتووەکان ڕێککەوتنێکیان بۆ پاڵپشتیکردنی ئاوارە گەڕاوەکانی عێراق واژۆ کرد، کە تێیدا مەدرید بڕی 1 ملیۆن یۆرۆ بۆ ئەم مەبەستە تەرخان دەکات.

وێنە گەورەکە: ئەم هاوکارییە داراییەی ئیسپانیا لە کاتێکدایە کە عێراق هەوڵ دەدات دۆسیەی ئاوارەکان بە یەکجاریی دابخات و ژیانی ئاسایی بۆ ناوچە ئازادکراوەکان بگێڕێتەوە؛ پشتگیریی نێودەوڵەتیی بۆ "دووبارە شیاندنەوە" کلیلە بۆ ڕێگریی لە سەرهەڵدانەوەی توندوتیژیی و چەسپاندنی ئاشتیی کۆمەڵایەتیی لەو ناوچانەی کە بەهۆی جەنگەوە وێران بوون.

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا ئاشکرای کرد: "ئەم هەنگاوە بەشێکە لە هەوڵە نێودەوڵەتییەکان بۆ بونیادنانەوەی متمانە، شیاندنەوە و تێکەڵکردنەوەی ئەو هاووڵاتییانەی لە کەمپەکانەوە دەگەڕێنەوە بۆ سەر ماڵ و حاڵی خۆیان تاوەکو ژیانێکی سەقامگیر بۆ ناوچە زیانلێکەوتووەکان بگەڕێتەوە".

زانیاریی زیاتر: ڕێوڕەسمی واژۆکردنی ئەم ڕێککەوتنە لە دیوانی وەزارەتی دەرەوە لە بەغدا بەڕێوەچوو، کە تێیدا تیتۆن میترا، نوێنەری نیشتەجێی بەرنامەی گەشەپێدانی نەتەوە یەکگرتووەکان (UNDP) لە عێراق و نوێنەری لایەنی ئیسپانیی بەشدارییان تێدا کرد.

ئەمەش بزانە: بەپێی بڕگەکانی ڕێککەوتنەکە، حکومەتی ئیسپانیا بڕی 1 ملیۆن یۆرۆ وەک مینحەی دارایی پێشکەش بە UNDP دەکات تاوەکو لە پڕۆژە هاوبەشەکانی ناوخۆی عێراقدا خەرج بکرێت.