فێڵێکی مەترسیدار لە بازاڕەکانی هەرێمی کوردستان سەرهەڵدەدات

ئاڤا نیوز

 

بەپێی بەدواداچوونێکی مەیدانیی ئاڤا میدیا، دیاردەیەکی نوێی "فێڵکردن" لە بازاڕەکانی کوردستان سەریهەڵداوە؛ بازرگانان کاڵای چینی هاوردە دەکەن و لێرە لۆگۆ و ناوی وڵاتانی ئەوروپی و مارکە جیهانییەکانی لێ دەدەن.

 

بۆچی گرنگە: ئەمە تەنیا گۆڕینی ناو نییە؛ کڕیاران پارەی کاڵای "ئۆرجیناڵ" و ئەوروپی دەدەن، بەڵام کاڵایەکی چینی کوالێتی نزم وەردەگرن. ئەمەش واتە قازانجی خەیاڵی بۆ فرۆشیار لەسەر گیرفانی هاووڵاتی و زیانی هاونیشتمانیان لە کڕینی ئەو کاڵایانە.

 

- یوسف، بازرگانێکی شارەزای بازاڕی چین، میکانیزمەکە دەخاتە ڕوو و لەوبارەیەوە بە ئاڤای گوت: بازرگانان لەڕێگەی سیستەمی (OEM) و (ODM)ـەوە هەر لە کارگەکانەوە داوا دەکەن ناو و شێوەی کاڵاکە بەپێی ویستی ئەوان گۆڕانکاری تێدا بکرێت. کاڵای بێ ناو (Unbranded) دەهێنن و لە کۆگا ناوخۆییەکاندا ناوی وڵاتانی تری لەسەر چاپ دەکەن.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانیی هەرێم، هەواڵەکەی بۆ ئاڤا پشتڕاستی کردەوە کە ئەمە بووەتە دیاردە و ڕایگەیاند: "چەندین بازرگان بەهۆی ئەم فێڵانەوە ڕووبەڕووی دادگا کراونەتەوە."

- داواش لە هاونیشتمانیان دەکات هەر کاتێک گومانیان لە کاڵایەک کرد، دەستبەجێ لیژنەکانی چاودێریی بازرگانی ئاگادار بکەرەوە.

 

چارەسەر: چۆن وەک هاونیشتمانییەک خۆت دەپارێزیت:

 

٠ بارکۆد بپشکنە: بەکارهێنانی ئەپڵیکەیشنی مۆبایل بۆ دۆزینەوەی وڵاتی ڕاستەقینەی بەرهەمهێنەر.

٠ سەیری چاپەکە بکە: زۆرجار ئەو لۆگۆیانەی لێرە لێ دەدرێن، کوالێتییان نزمە و بە ئاسانی لێ دەبنەوە یان کاڵ دەبنەوە.

 

٠ داوای وەسڵ بکە: هەمیشە وەسڵی فەرمی وەربگرە کە ناوی وڵاتی دروستکەر و ماوەی گەرەنتی تێدا نووسرابێت.