حکومەت پارەی قەرزی کارەبای کەڵەکەبووی هۆتێل و مۆتێلەکان وەردەگرێتەوە؛ کارەبای بەشێکیان بڕدراوە

ئاڤا نیوز

 

حکومەتی هەرێمی کوردستان دەستی کردووە بە بڕینی کارەبای ئەو هۆتێل و مۆتێلانەی هەولێر کە قەرزی کۆنیان لەسەرە و داوا دەکات قەرزەکان بە "کاش و بە یەکجار" بدەنەوە، نەک بە قیست.

 

وێنە گەورەکە: بەگوێرەی بەدواداچوونێکی هیشام سەعید، پەیامنێری ئاڤا لە کۆی 385 هۆتێل و مۆتێل لە هەولێر نزیکەی %50 قەرزاری کارەبان، بەجۆرێک قەرزی هۆتێل و مۆتێلەکان  لە 10 ملیۆن دینارەوە دەست پێ دەکات تا دەگاتە 300 ملیۆن دینار.

 

- پێشتر بڕیار هەبوو قەرزەکان بە قیست وەربگیرێنەوە، بەڵام بەهۆی پابەندنەبوونی خاوەنکارەکان، ئێستا بەڕێوەبەرایەتیی کارەبا سیستەمی قیستی ڕاگرتووە و داوای تەواوی پارەکە دەکات.

 

خاوەن هۆتێلەکان چی دەڵێن: توانا نەشئەد خاوەن هۆتێلە و 29 ملیۆن قەرزارە و کارەبای بڕدراوە. ئەو دەڵێت: "لە وەرزی زستاندا بازاڕ لاوازە، توانامان نییە پارەکە بە کاش و یەکجار بدەین، داوای قیستی درێژخایەن دەکەین". شێرکۆ پشدەری یەکێکی دیکەیە لە خاوەن هۆتێلەکان، ئەو 39 ملیۆن قەرزارە. شێرکۆ بە ئاڤای گوت: "قەرزەکە هی ساڵانی ڕابردووە کاتێک دەبوایە پارەی گاز بۆ مۆلیدە و کارەبای نیشتمانیش بدەین، بۆیە لەسەرمان کەڵەکە بوو."

 

لایەنی پەیوەندیدار چی دەڵێن: شوکر عەزیز، جێگری سەرۆکی کۆمەڵەی میوانخانە و چێشتخانەکانی هەولێر بە ئاڤای گوت: ئێمە بە هەموو شێوەیەک پاڵپشتیان دەکەین و دەنگمان گەیاندوونەتە هەموو لایەنە پەیوەندیدارەکان.

- بەختیار قاسم، بەڕێوەبەری گشتیی کارەبای هەولێر گوتی: وەک وەزارەت لەلای ئێمە بە بڕیار قیست نەماوە، بەڵام تاکە چارەسەر ئەوەیە دەستەی گەشتوگوزار و وەزارەتی شارەوانی داوا لە ئەنجوومەنی وەزیران بکەن بۆ ئەوەی چارەسەرێک بۆ ئەم دۆخە بدۆزێتەوە. 

- ئیبراهیم عەبدولمەجید، وتەبێژی دەستەی گەشتوگوزاری هەرێمی کوردستانیش بە ئاڤای گوت: ئێمە و وەزارەتی شارەوانی و گەشتوگوزار نوسراومان کردووە و هەموو هەوڵێک دەدەین بۆ ئەوەی کێشکە چارەسەر بکەین.