سەرۆک بارزانی پێشوازی لەو گەنجە کرد کە لە سەر ئاڵای کوردستان ئازار درابوو

ئاڤا نیوز

لەمیانی پێشوازی لە چەند گەنجێکی دووزخورماتوو کە ڕۆژی هەڵبژاردن لەلایەن سوپای عێراق ئازار درابوون، سەرۆک بارزانی وتی، هیچ کەس و لایەنێک بۆی نییە سوکایەتی بە ئاڵای کوردستان بکات.

چیرۆکی سەرەکی: ڕۆژی 11-11-2025 لە کاتی بەڕێوەچوونی هەڵبژاردنی ئەنجوومەنی نوێنەرانی عێراق، چەند گەنجێکی کورد ئاڵای کوردستانیان بەرز کردەوە، دواتر یەکێک لەو گەنجانە لەلایەن سەربازێکی سوپای عێراق بە چەک هێرشی کرایە سەر و ئازار درا. دوای ئەوەی ئەم ڕووداوە لە تۆڕە کۆمەڵایەتییەکان کاردانەوەی زۆری دروست کرد، سوپای عێراق ڕایگەیاند ئەو سەربازەیان دەستگیرکردووە کە هێرشی کردە سەر گەنجە کوردەکە.

ڕاگەیێنراوی فەرمی: بارەگای بارزانی ڕایگەیاند، ئەمڕۆ شەممە 15-11 لە پیرمام سەرۆک بارزانی پێشوازی کرد لە کۆمەڵێک گەنجی دووزخورماتوو، لەو دیدارە سەرۆک بارزانی وێڕای سوپاس و دەستخۆشی بۆ بوێری و كوردپەروەرییان جەختی لەوە كردەوە، لەپێناو ئاڵای كوردستاندا خوێن و قوربانییەكی زۆر دراوە، ئاڵای كوردستان ئاڵای هەموو كوردێكە و هەر كوردێك مافی دەستووری و یاسایی خۆیەتی كە شانازی بە ئاڵا و پیرۆزییەكانی گەلەكەی بكات. 

سەرۆک بارزانی ئەوەشی وتووە، هیچ كەس و لایەنێكیش بۆی نیە لەژێر هیچ بیانوویەك سووكایەتی بە ئاڵای كوردستان بكات یان ڕێگری لە هەڵكردنی بكات.

باکگراوند: ڕۆژانی بانگەشە و ڕۆژی هەڵبژاردنی ئەنجوومەنی نوێنەرانی عێراق، چەندین ڕووداوی پەیوەست بە هەڵکردنی ئاڵای کوردستان لە پردی و دووزخورماتوو تۆمار کران، بەشێکیان لەلایەن سوپای عێراق و بەشێکی دیکەیان لەلایەن حزبێکی تورکمانی ئەنجام دران.