بۆ ڕووبەڕووبوونەوەی ئەگەری دروستبوونی لافاو هەولێر سوود لە پۆند وەردەگرێت

ئاڤا نیوز

بۆ ڕووبەڕووبوونەوەی ئەگەری دروستبوونی لافاو لە ناو شاری هەولێر، ئامادەکاریی تەواو کراوە، جێگری پارێزگاری هەولێر دەڵێت: "بۆ گلدانەوەی ئاوی باران سوود لەو پۆندانە وەردەگرین کە لە هەولێر دروستکراون".

وێنە گەورەکە: لە ساڵانی ڕابردوودا بەشێکی زۆری گەڕەکەکانی هەولێر مەترسی لافاوی لەسەر بوو، تەنانەت بەشێکی گەڕەکەکان بەهۆی لافاوەوە زیانی زۆریان بەرکەوت، بەڵام حکومەتی هەرێمی کوردستان لەسەرەتای دەستبەکاربوونی کابینەی نۆیەم کۆمەڵێک پرۆژەی نوێی جێبەجێکرد، بەمەبەستی کەمکردنەوەی کاریگەرییەکانی لافاو.

لێدوانی فەرمی: مەسعود کاڕەش، جێگری پارێزگاری هەولێر بە ئاڤا میدیای ڕاگەیاند، ئەو پۆندانەی کە لە بنەسڵاوە و دارەتوو و هەولێری نوێ دروستکراون، کاریگەریی تەواویان لەسەر کەمکردنەوەی ئاوی باران دەبێت کە لە بەرزاییەکانی هەولێر بەرەو سەنتەری شاری هەولێر دێنە خوارەوە، چونکە هەولێر شوێنەکەی نزمە، ئەو پۆندانەشی کە دروستکراون، شوێنەکانیان بەرزن.

ئاماژە بەوەش دەکات، دروستکردنی ئەو پۆندانە دەبنە بەربەست، بەتایبەتی بە ئاراستەی دارەتوو و بنەسڵاوە، بەمەش ئاوی باران گلدەدرێتەوە، ئەوەش لەلایەک سوودی بۆ ئاوی ژێر زەوی دەبێت، لەلایەکی دیکەوە هەولێر دەپارێزێت لەو بڕە ئاوە زۆرەی کە دێتە ناو شاری هەولێر.

لەلایەکی دیکەوە: ئەو زێرابانەی لە ناو شاری هەولێر هەن، بە هۆی خاوێنکردنەوەیان، کاریگەری لەسەر کەمکردنەوەی مەترسی لافاو دەبێت لە ناو شاری هەولێر، هەروەها تیمەکانی ڕێگاوبان بەشێوەی ڕێکوپێک کاری خۆیان کردووە، بە تایبەتی لە ڕێگاکانی دەرەوەی شار، وەکو ڕێگای شەقڵاوە، کەرکووک، خەبات.