عەبدولخالق تەلعەت: بڕیاری گواستنەوەی زیندانییانی داعش بۆ کوردستان و عێراق مەترسیدارە

ئاڤا نیوز

بەهۆی شەڕ و ئاڵۆزییەکانی سووریا، ئەمریکا بڕیاری داوە حەوت هەزار زیندانیی داعش لە کەمپ و زیندانەکانی رۆژئاوای کوردستان بگوازێتەوە بۆ زیندانەکانی عێراق و هەرێمی کوردستان، شارەزایانی سەربازی ئەم کارە بە مەترسی دەزانن بۆ ناوچەکە و ئایندەی عێراق.

چیرۆکی سەرەکی: ئێوارەی ڕۆژی چوارشەممە، فەرماندەیی ناوەندیی هێزەکانی ئەمریکا (سێنتکۆم)، بڕیاری دا حەوت هەزار زیندانی داعش لە کەمپ و زیندانەکانی باکووری سووریاوە بۆ ناو خاکی عێراق بگوازێتەوە.

لێدوانی فەرمی: لیوا عەبدولخالق تەلعەت، شارەزای سەربازی بە ئاڤای وت، بارودۆخی سنورەکانی نێوان عێراق و سووریا لەوپەڕی مەترسیدایە و بڕیاری گواستنەوەی زیندانییەکان مەترسیدارە و داهاتوویەکی ترسناک بۆ ناوچەکە دروست دەکات، چونکە بەشێک لە زیندانەکان خەڵکی عێراقن و بە ماددەی چواری تیرۆر دەستگیرکراون.  

لەبارەی ئەوەی ئایا بەشێک لەو زیندانییانە دەگوازرێنەوە بۆ زیندانییەکانی هەرێمی کوردستان، ئەو شارەزا سەربازییە وتی:  لە زیندانی ناسرییە شوێن نەماوە بۆ وەرگرتنی ئەو زیندانییانە و ناوی زیندانییەکانی سووسێ و چەمچەماڵ لە سنووری پارێزگای سلێمانی دەهێنرێت بۆ وەرگرتنی ئەو زیندانییانە، چونکە ئەو دوو زیندانە سەر بە وەزارەتی دادی عێراقن و ئەوان سەرپەرشتی دەکەن لە ئەگەری گواستنەوەی زیندانییەکان بۆ ئەو دوو شوێنە ئەوە مەترسییەکە زیاتر دەکات.

زانیاریی زیاتر: لیوا عەبدولخالق تەلعەت، ئاماژەشی بەوەکرد، گواستنەوەی زیندانییەکان بڕیارێکی ئاسان نییە و پێویستی بە ڕێکاری یاسایی و ئەمنی تایبەتی هەیە، لەبەرئەوە عێراق ئامادەباشی کردووە سنوورەکانی بە بەرد و تەلەبەند و هێزی ئەمنی تووند کردووە هێزێکی زۆر ڕەوانەی سەر سنوور کراون.