سوودانی ڕەزامەندی لەسەر خەرجکردنی مووچە دا؛ هێشتا تەیف سامی واژۆی نەکردووە

ئاڤا نیوز

تەیف سامی، وەزیری دارایی عێراق لە دوو ڕۆژی ڕابردوودا پێداچوونەوەی بە لیستی مووچەی مووچەخۆرانی کوردستان کردووە، هیچ تێبینییەکی نەبووە و لەبارەی خەرجکردنی پارە نووسراوی بۆ محەممەد شیاع سوودانی، سەرۆکوەزیرانی عێراق کردووە. سوودانیش ڕەزامەندی خەرجکردنی دەربڕیوە.

چیرۆکی سەرەکی: بۆ خەرجکردنی مووچەی مانگی چواری فەرمانبەرانی کوردستان، ماوەی سێ ڕۆژە پێداچوونەوە بە لیستی مووچە لەلایەن وەزارەتی دارایی عێراق کراوە، بەڵام تا ئێستا بڕیاری خەرجکردنەکە نەدراوە.

زانیاریی زیاتر: ئەمڕۆش تەیف سامی، تاوەکو کاتژمێر یەکی دوای نیوەڕۆ لەشوێنی کارەکەی لە وەزارەت بووە و دەوامی کردووە، بەڵام واژۆی لەسەر ناردنی پارە نەکردووە.

زانیاریی بەدەستهاتوو: ئاڤا زانیویەتی هەر ئەمڕۆ لە بەغدا تەیف سامی، بەشداری لە کۆبوونەوەی ئەنجوومەنی باڵای ئابووریی عێراق کردووە کە لەبارەی قەیرانی دارایی و نرخی نەوت گفتوگۆیان کردووە.

ئەوەی پێویستە بیزانیت: لەڕووی تەکنیکی و سیاسییەوە خەرجکردنی مووچە هیچ کێشەیەکی بۆ دروست نەبووە و لسیتەکە کێشەی نەبووە. تەنیا وەزارەتی دارایی عێراق خۆیان کێشەی ئیدارییان هەیە بۆیە ناردنی پارە دواکەوتووە.

کاردانەوەکان: ئاڤا زانیویەتی ئەگەر سبەی سێشەممە پارە لەلایەن بەغداوە نەنێردرێت، حکومەتی هەرێمی کوردستان شاندێک ڕەوانەی بەغدا دەکات و دەست بە دروستکردنی فشار دەکات، بزانن بۆچی تا ئێستا نەنێردراوە.

لەلایەکی دیکەوە: ئێوارەی ئەمڕۆ مەسرور بارزانی، سەرۆکوەزیرانی کوردستان لە بەغدا بۆ بەشداریکردن لە پرسەی کوڕی ئەیاد عەلاوی، قسەی بۆ میدیاکان کرد و لەبارەی مووچە گوتی: ئێمە لەلای خۆمان ئەوەی لەسەرمان بووە ئەنجاممان داوە، ئەركی خۆمان جێبەجێ كردووە و هیوادارین حكومەتی عێراقی فیدڕاڵیش ئەرك و بەرپرسیارێتی خۆی جێبەجێ بكات

ئەمەش بزانە: ئێستا لە عێراق مشتوومڕێک درووست بووە، لەنێوان هەندێک لە پەرلەمانتاران و تەیف سامی و حکومەت، لەسەر بابەتی پارە ڕاکێشانیان لە بانکەکان بۆ مووچە و قەیرانی دارایی، بەهۆی دابەزینی نرخی نەوتەوە.