نەخۆشخانەی ڕاپەڕینی هەولێر زیاتر لە توانای خۆی پێشوازی لە منداڵانی نەخۆش دەکات

ئاڤا نیوز

لەگەڵ هاتنی وەرزی پاییز و گۆڕانی کەشوهەوا پەتایەکی قورس بڵاوبووتەوە و بە هۆیەوە بەشێکی زۆر لە هاووڵاتییانی هەرێمی کوردستان نەخۆش کەوتوون؛ بەڕێوەبەری نەخۆشخانەی ڕاپەڕینی هەولێریش دەڵێت: ڕۆژانە زیاتر لە پێنج هێندەی ڕێژەی ئاسایی پێشوازی لە منداڵی نەخۆش دەکرێت.

وێنە گەورەکە: هەولێر یەک نەخۆشخانەی حکومی تایبەت بە منداڵانی هەیە، جگە لە ناوخۆی هەولێر، لە دەورووبەری هەولێر و شارەکانی دیکەش سەردانی نەخۆشخانەی ڕاپەڕین دەکەن.

لێدوانی تایبەت: د. مەحموود محەممەد، بەڕێوەبەری نەخۆشخانەی ڕاپەڕینی هەولێر تایبەت بە ئاڤا میدیا ڕایگەیاند، ئەم پەتا وەرزییە نەخۆشییەکی ئاساییە و هەموو ساڵێک لەگەڵ هاتنی وەرزی پاییز و زستان بڵاو دەبێتەوە، بەڵام ڕۆژانە بە نزیکەیی 600 تاوەکو 800 منداڵی نەخۆش سەردانی بەشی ڕاوێژکاریی نەخۆشخانەی ڕاپەڕین دەکەن، ڕێژەی هەرە زۆریان بەهۆی پەتای وەرزییەوە سەردانی نەخۆشخانەکە دەکەن.

بەڕێوەبەری نەخۆشخانەی ڕاپەڕین دەشڵێت، "هەر چەندە لە بەشی فریاکەوتن 80 شوێنمان بۆ مانەوە هەیە، بەڵام بە بەردەوامی و بە نزیکەیی دوو هێندەی ڕێژەی ئاسایی جێگا بۆ منداڵی نەخۆش دەکەینەوە.