چاوەڕوان دەکرێت گۆڕانکاری لە ژمارەی کورسیی لایەنەکاندا ڕووبدات

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق، تاوەکو ئێستا ئەنجامی بەرایی 99٪ی ئەنجامی دەنگدانی بڵاو کردووەتەوە و چاوەڕوان دەکرێت بە تەواوبوونی پرۆسەی جیاکردنەوەی دەنگەکان گۆڕانکاری لە کورسی لایەنە کوردستانییەکان ڕووبدات.

وێنە گەورەکە: لە 11ی ئەم مانگە، هەڵبژاردنی پەرلەمانی عێراق بەڕێوەچوو و دوای ئەوە بە 24 کاتژمێر، کۆمیسیۆنی هەڵبژاردنەکان ئەنجامیی بەرایی بڵاوکردەوە، تەنها ئەنجامی چەند وێستگەیەک ماوەیە دوای یەکلاکردنەوەیان چاوەڕوان دەکرێت گۆڕانکارییەک لە ژمارەی کورسییەکان دروست بکات. 

زانیاریی زیاتر: كۆمیسیۆن ئەنجامی نزیكەی سەدا 99ی دەنگدانی گشتیی بڵاوكردووەتەوە، کورسییەکان بەپێی سیستەمی سانتلیگۆ دابەش كراون، بەپێی دابەشكارییەكە تاوەكو ئێستا كورسیی لایەنە كوردستانییەكان بەمشێوەیەن:

- پارتی دیموکراتی کوردستان لە نێوان 33 بۆ 34 كورسییە، ئەمە بە پێنج کورسیی کۆتایی پێکهاتەکانەوەیە کە پارتی  پشتگیری دەکردن و دەرچوون.

- یەكێتی 17 كورسی، ڕەوتی هەڵوێست پێنج کورسی، یەكگرتوو چوار کورسی، نەوەی نوێ سێ كورسی.

- بەمشێوەیە بێت لە خولی داهاتووی پەرلەمانی عێراق، کورد بە كۆتای پێکهاتەکانەوە دەبێتە خاوەنی 63 بۆ 64 کورسی. 

زانیاریی زیاتر: هۆکاری ئەوەی کە تاوەکو ئەنجامی 100٪ دەنگدان ڕانەگەیێنراوە، دەنگی ژمارەیەک وێستگە تاوەکو ئێستا هێشتا جیا نەکراوەنەتەوە و کێشەی تەکنیکی تێدا بووە.