سەرۆکایەتی تورکیا لەبارەی چەکدانان و خۆهەڵوەشاندنەوەی پەکەکە کۆدەبێتەوە

ئاڤا نیوز

بڕیارە ئەمڕۆ بە سەرۆکایەتیی ڕەجەب تەیب ئەردۆغان، سەرۆککۆماری تورکیا لەسەر پرسی چەکدانان و خۆهەڵوەشاندنەوەی پەکەکە و قۆناغی دوای ئەوە کۆببێتەوە.

وێنە گەورەکە: ڕۆژی دووشەممە2025-05-12، پارتی کرێکارانی کوردستان 'پەکەکە' ئەنجامی کۆنگرەی 12ـی خۆی ئاشکرا کرد و چەکدانان و هەڵوەشاندنەوەی خۆی ڕاگەیاند.

ئەوەی پێویستە بیزانیت: ڕۆژانی 5 تا 7ـی ئایاری ئەمساڵ کۆنگرەی 12ـی پەکەکە لە یەک کاتدا لە دوو ناوچەی جیاواز بە هۆکاری ئەمنی بەسترا، بە کۆی گشتی 232 نوێنەر بەشداربوون.

زانیاری بەدەستهاتوو: میدیاکانی تورکیا بڵاویانکردەوە، ئەمڕۆ دوای ڕاگەیێنراوی خۆهەڵوەشاندنەوەی پەکەکە، سەرۆکایەتیی تورکیا بە سەرۆکایەتیی ڕەجب تەیب ئەردۆغان، سەرۆککۆماری تورکیا کۆدەبێتەوە ڕاگەیێنراوی پەکەکە لەسەر خۆهەڵوەشاندنەوە و قۆناغی دوای ئەوە تەوەری سەرەکی کۆبوونەوەکە دەبێت.

لەلایەکی دیکەوە: عومەر چەلیک، وتەبێژی پارتی داد و گەشەپێدانی تورکیا ڕایگەیاند: دوای بانگەوازەکەی ئیمرالی، بڕیارەکەی پەکەکە بۆ خۆهەڵوەشاندنەوە قۆناغێکی گرنگە و دەرگای دەستپێکردنی سەردەمێکی نوێ واڵا دەکات هاوکات گوتیشی تورکیا لە نزیکەوە چاودێری هەڵوەشاندنەوەی پەکەکە دەکات.