ترەمپ: هیوادارم بە ئاشتییانە لەگەڵ ئێران بگەینە ڕێککەوتن

ئاڤا نیوز

 

سەرۆکی ئەمریکا ڕایگەیاند، دەمانەوێت بگەینە ڕێککەوتنێک لەگەڵ ئێران و پێموایە زۆر نزیکیشین لە گەیشتن بە ڕێککەوتنێکی گشتگیر سەربارەت بە بەرنامە ئەتۆمییەکانی تاران.

 

وێنە گەورەکە: لەکاتێکدا دانوستانەکانی نێوان ئەمریکا و ئێران سەبارەت بە پرسی ئەتۆمیی ئێران بەردەوامن، سەرۆکی ئەمریکا دوێنێ چەندین سزای دیکەی نوێی بەسەر ئەو وڵاتەدا سەپاند و دووپاتیکردەوە بەهیچ شێوەیەک ڕێگە بە تاران نادەین ببێتە خاوەنی چەکی ئەتۆمی.

 

لێدوانی فەرمی: دۆناڵد ترەمپ، سەرۆکی ئەمریکا لە کۆنگرەیەکی ڕۆژنامەوانی لە دەوحەی پایتەختی قەتەر ڕایگەیاند: دانوستانی جددی لەگەڵ ئێران هەیە بۆ فەراهەمکردنی ئاشتییەکی درێژخایەن و ئەگەر ئەوە ڕووبدات ئەوا شتێکی سەرسوڕهێنەر دەبێت.

- ئێران بە هەندێک لە مەرجەکان ڕازی بووە، منیش داوایان لێدەکەم بگەینە ڕێککەوتن بەبێ ئەوەی چەکی ئەتۆمی بەدەست بهێنێت.

- دەبێت ئێران سوپاسی قەتەر بکات، کە ڕێگە نادات هێرش بکرێتە سەریان، بە پێچەوانەی وڵاتانی دیکە.

- دەمەوێت ئێران وڵاتێکی بەهێز و پتەو بێت، بەڵام بەبێ ئەوەی خاوەنی چەکی ئەتۆمی بێت.

لەلایەکی دیکەوە: ڕاوێژکارێکی عەلی خامنەیی ڕایگەیاند: ئامادەیین ڕێککەوتن لەگەڵ ئەمریکا بکەین و دەستبەرداری چەکی ئەتۆم بین، بەڵام بەمەرجێک سەرجەم گەمارۆکانی سەر تاران هەڵبگیرێن.