لە هەرێمی كوردستان سەرووی 33 هەزار منداڵ گەڕێندراونەتەوە بەر خوێندن

ئاڤا نیوز

لە چوارچێوەی پرۆگرامی 'گەڕانەوە بۆ خوێندن' کە حکومەتی هەرێمی کوردستان ماوەی سێ ساڵە پەیڕەوی دەکات، سەرووی 33 هەزار منداڵ گەڕێندراونەتەوە بەر خوێندن.

چیرۆکی سەرەکی: کۆبوونەوەکانی گفتوگۆی ڕاپۆرتی خولی پێنجەم و شەشەم تایبەت بە ڕێککەوتنامەی مافەکانی منداڵ لە شاری جنێڤ بەردەوامن، کە شاندێکی هەرێمی کوردستان لەچوارچێوەی شاندی حکومەتی عێراق، لەو گفتوگۆیانە بەشدارن، لەو چوارچێوەیەشدا ڕاپۆرتی گرنگیدانی حکومەتی هەرێمی کوردستان بە کەرتی پەروەردە و دابینکردنی خوێندن بۆ منداڵان خوێندرایەوە.

ژمارەکان وا دەڵێن: ئاماری ناوەندەکانی خوێندن و ژمارەی فێرخوازان لە هەرێمی کوردستان دڵخۆشکەرن، بەجۆرێک ئێستا لە سەرانسەری هەرێمی کوردستان (حەوت هەزار و 370) قوتابخانە هەن، کە (شەش هەزار و 863)ـیان حکومین، تێکڕای قوتابیانیش لە ساڵی خوێندنی 2024-2025، یەک ملیۆن و 755 هەزار و 818 قوتابین کە ( 883 هەزار و 725) کوڕن و (872 هەزار و 93) قوتابی، کچن.

 

بابەتە ستراتیژییەکە: حکومەتی هەرێمی کوردستان بە ئامانجی نەهێشتنی نەخوێندەواری و ڕووبەڕووبوونەوەی دیاردەی کارکردن بە منداڵان، پرۆگرامی 'گەڕانەوە بۆ خوێندن' جێبەجێ دەکات کە لە ماوەی سێ ساڵی ڕابردوودا، 33،271 منداڵ گەڕێندراونەتەوە بۆ خوێندن.

 

زانیاریی زیاتر: حکومەتی هەرێمی کوردستان لەپاڵ پرۆگرامی 'گەڕانەوە بۆ خوێندن'، چەندین ناوەندیی فێرکاری لە چاکسازییەکانی نەوجەوانان دامەزراندووە، جگە لە دامەزراندنی پلاتفۆرمی قوتابخانەی ئەلیکترۆنی و کردنەوەی سەنتەر و پەیمانگەی تایبەت بە خوێندنی منداڵانی خاوەن پێداویستی تایبەت، کە ئێستا ژمارەیان 10 هەزار و 366 قوتابیە.