دەقی نامەی بارزانیی نەمر بۆ سەرۆکی فەرەنسا لە ساڵی 1968ـدا

ئاڤا نیوز

نامەیەکی بارزانیی نەمر کە 58 ساڵ پێش ئێستا بۆ جەنەڕال دیگۆل، سەرۆکی ئەوکاتی فەرەنسا ناردووێتی و لە ئەرشیفی ئەو وڵاتە پارێزراو بووە، دەدرێتە سەرۆک بارزانی، لە بەشێکی نامەکە بارزانیی نەمر بە دیگۆل دەڵێت، "ئێوه‌ن كه‌ وڵاته‌كه‌ی خۆتان به‌ره‌و سه‌رفرازی برد، ناتوانن كه‌ هاوهه‌ستیی گه‌لی كوردی شاخنشین نه‌بن."

چیرۆکی سەرەکی: لە میانی كۆبوونەوەیدا لەگەڵ سەرۆك بارزانی، وەزیری دەرەوەی فەرەنسا، نامەیەكی بارزانیی نەمری پێشكەشی سەرۆك بارزانی كرد كە لە ساڵی 1968 بۆ جەنەڕاڵ دیگۆل، سەرۆكی فەرەنسا نێردرابوو و لە ئەرشیفی وەزارەتی دەرەوەی فەرەنسادا هەڵگیرا بوو.

ده‌قی نامه‌كه‌ی مسته‌فا بارزانی بۆ دیگۆل:

جه‌نه‌ڕاڵ..
بواری پیره‌ پیاوێكی وه‌كو من بده‌، تا ئه‌م داواكارییه‌ گرنگه‌تان بۆ ڕه‌وانه‌ بكات، پیره‌ پیاوێك، كه‌ له‌ سه‌ره‌تای لاوێتییه‌وه‌، بۆ ئازادی و پاراستنی كه‌رامه‌تی گه‌له‌كه‌ی خه‌بات ده‌كات. ئێوه‌ گه‌وره‌ترین خه‌باتگێڕی ڕاپه‌ڕینن له‌ ئه‌وروپا، ئێوه‌ن كه‌ وڵاته‌كه‌ی خۆتان به‌ره‌و سه‌رفرازی برد، ناتوانن كه‌ هاوهه‌ستیی گه‌لی كوردی شاخنشین نه‌بن كه‌ ماوه‌ی شه‌ش ساڵی ڕه‌به‌قه‌ له‌ باكووری عێراق، له‌ خه‌باتی بێوچاندایه‌، له‌وه‌ش زیاتر، ئێوه‌ سه‌رۆكی فه‌ره‌نسان، سه‌رۆكی ئه‌و نه‌ته‌وه‌ به‌رز و باڵایه‌ن كه‌ پره‌نسیپی ئازادییه‌ سیاسییه‌كان و مه‌بده‌ئی مافی چاره‌ی خۆنووسینی گه‌لانى پێشكه‌ش به‌ دونیا كرد، له‌وه‌ش زیاتر ئێوه‌ (جه‌نه‌ڕاڵ دیگۆل)ـی ڕزگاریكه‌ری سه‌رجه‌م وڵاته‌ بێگانه‌ فه‌ره‌نسی زمانه‌كانە، دوژمنی سه‌رسه‌ختی هه‌موو واتایه‌كی چه‌وساندنه‌وه‌یە و دۆستی ڕاسته‌قینه‌ی هه‌موو كه‌سێكی ئازادیخوازە.

جه‌نه‌ڕاڵ..
ئێوه‌ سوور بوون له‌سه‌ر ناڕه‌زایی ده‌ربڕین به‌رامبه‌ر شه‌ڕی (ڤێتنام)، من بێ گومانم كه‌ له‌لای ئێوه‌دا مه‌سه‌له‌ی گه‌لی كورد له‌ هی ڤێتنامییه‌كان كه‌متر نییه‌.

ئێمه‌ له‌م شه‌ڕ و خه‌باته‌ی پاراستنی نه‌ته‌وه‌كه‌ماندا، به‌ته‌واوه‌تی تاك و ته‌نیاین، سازمانی نه‌ته‌وه‌یه‌كگرتووه‌كان ئێمه‌ی پشتگوێ خستووه‌، هه‌روه‌ها چه‌ندین زلهێزیش له‌ یارمه‌تیدانی عێراق، به ‌نوێترین چه‌كی وێرانكار، پێشبڕكێی یه‌كتر ده‌كه‌ن، بۆیه‌ دوا لایه‌نێك مابێته‌وه‌ كه‌ ئێمه‌ چاوه‌ڕوانی ئومێدی لێ بكه‌ین، ته‌نیا (دیگۆل)ـی فه‌ره‌نسایه‌.

ئه‌مڕۆ، كه‌ عێراقییه‌كان داوای چه‌ك له‌ فه‌ره‌نسا ده‌كه‌ن، ئێمه‌ لامان وایه‌ به‌بێ چاره‌سه‌ركردنێكی مه‌بده‌ئیی كێشه‌ی كورد، هه‌ر چه‌ك ناردنێك بۆ عێراق، ته‌نیا ده‌بێته‌ هۆی كاولكردنی وڵاتمان و كوشتنی به‌كۆمه‌ڵی ئافره‌ت و منداڵانمان. قورئانی پیرۆز ده‌ڵێ: (بۆ هه‌موو مرۆڤێك له‌ ئاسماندا به‌هه‌شتێكی بچووك هه‌یه‌، كه‌ له‌ كاتی نوێژدا ده‌توانێت ڕووی تێ بكات). ئێوه‌ و فه‌ره‌نسا به‌هه‌شتی ئاسمانی ئێمه‌ن.“

مسته‌فا بارزانى
عێراق – كوردستان 8ـی شوباتی 1968