مەزڵووم عەبدی: لەگەڵ وەزیری دەرەوەی فەرەنسا جەختمان لە پاراستنی تایبەتمەندیی ناوچە كوردییەكان كردەوە

ئاڤا نیوز

مەزڵووم عەبدی لەبارەی كۆبوونەوەی لەگەڵ وەزیری دەرەوەی فەرەنسا دەڵێت، جەختمان لە پاراستنی تایبەتمەندیی ناوچە كوردییەكان و مافەكانی كورد لە سووریا كردەوە.

چیرۆکی سەرەکی: ئەمڕۆ هەینی 6ـی شوباتی 2026، لە شاری هەولێر، مەزڵووم عەبدی، فەرماندەی گشتیی هێزەكانی سووریای دیموكرات و شاندێکی ڕۆژئاوای کوردستان كە پێكهاتبوون لە ڕۆهڵات عەفرین، فەرماندەی گشتیی یەپەژە، ئیلهام ئەحمەد، بەرپرسی پەیوەندییەكانی دەرەوەی ئیدارەی خۆسەر. لەگەڵ ژان نوێل باڕۆ، وەزیری دەرەوەی فەرەنسا کۆبوونەوە.

بڵاوکراوەی فەرمی: مەزڵووم عەبدی، فەرماندەی گشتیی هەسەدە، لە ئەژماری فەرمیی خۆی لە تۆڕی كۆمەڵایەتی ئێكس نووسیویەتی، "لە كۆبوونەوەمان لەگەڵ ژان نوێل باڕۆ، وەزیری دەرەوەی فەرەنسا، گفتوگۆمان كرد لەبارەی وردەكارییەكانی جێبەجێكردنی ڕێككەوتنی 29ـی كانوونی دووەم، بەردەوامبوون لە بەرەنگاربوونەوەی داعش و ڕێگاكانی پاراستنی ئەو ناوەندانەی كە چەكدارانی داعش و خێزانەكانیانی تێدایە."

ئاماژەی بەوەشكرد، "جەختمان كردووەتەوە لەسەر پاراستنی تایبەتمەندیی ناوچە كوردییەكان و پاراستنی مافەكانی كورد لە سووریا، هەروەها باسمان لە یەكخستنی هێزە ئەمنی و سەربازییەكان بەهەموو وردەكارییەكانیەوە، بە هێزەكانی پاراستنی ژن (یەپەژە)ـەوە کرد.

لەلایەکی دیکەوە: وەزیری دەرەوەی فەرەنسا لە كۆبوونەوەكە تیشکی خستووەتە سەر گرنگیی جێبەجێکردنی تەواوەتیی ڕێککەوتنەکەی هەسەدە و دیمەشق و پشتگیریی وڵاتەکەشی بۆ سەرخستنی دەربڕیوە.