یەکەم کۆبوونەوەی سەرکردەکانی "دەستەی ئاشتیی غەززە" لە واشنتن ئەنجام دەدرێت

ئاڤا نیوز

سەرچاوەیەکی ئەمریکی ئاشکرای دەکات، کۆشکی سپی پلانی بۆ کۆبوونەوەیەکی "دەستەی ئاشتیی غەززە" لە واشنتن داناوە سەبارەت بە پرسی ئاوەدانکردنەوەی غەززە؛ ئەمەش لە چوارچێوەی جێبەجێکردنی قۆناغەکانی داهاتووی ئاگربەستی غەززەدایە.

بڵاوکراوەی فەرمی: ماڵپەڕی "ئەکسیۆس" لە ڕاپۆرتێکدا لە زاری بەرپرسانی ئەمریکییەوە ئاشکرای کردووە، کۆشکی سپی بەنیازە ڕۆژی 19ـی شوبات، یەکەمین کۆبوونەوەی سەرکردەکانی "دەستەی ئاشتیی غەززە" ئەنجام بدات. هەمان سەرچاوە دەشڵێت: کۆشکی سپی دەیەوێت ئەم کۆبوونەوەیە بەکار بهێنێت بۆ پاڵنان بەرەو جێبەجێکردنی قۆناغی دووەمی ئاگربەستی غەززە و کۆکردنەوەی پارە بۆ ئاوەدانکردنەوەی کەرتەکە.

ئەوەی پێویستە بیزانیت: لە مانگی یەکی ئەمساڵدا، بە سەرۆکایەتیی دۆناڵد ترەمپ، سەرۆکی ئەمریکا و بە ئامادەبوونی ژمارەیەک سەرکردەی جیهانی، واژۆ لەسەر "دەستەی ئاشتیی غەززە" کرا، کە ئامانج لێی دووبارە بنیاتنانەوەی غەززەیە لە ژێر سەرپەرشتیی ڕاستەوخۆی ئەمریکادا. پلانی ئەم کۆبوونەوەیە هێشتا لە قۆناغی سەرەتاییدایە و ئەگەری گۆڕانکاریی تێدایە.

ئەوەی لەبارەیەوە دەگوترێت: بەرپرسانی ئیسرائیل ئاماژەیان بە سەردانی بنیامین نەتانیاهۆ، سەرۆکوەزیرانی ئیسرائیل، لە 18ـی شوباتدا بۆ کۆشکی سپی کردووە تا چاوی بە ترەمپ بکەوێت؛ ئەمەش تەنیا ڕۆژێک پێش کۆبوونەوە پلانبۆداڕێژراوەکەیە.

ئەمەش بزانە: ئیسرائیل بانگهێشتی ترەمپی قبووڵ کردووە بۆ ئەوەی پەیوەندی بە دەستەی کارگێڕییەوە بکات، بەڵام تا ئێستا واژۆی لەسەر میساقەکەی نەکردووە. ئەگەر نەتانیاهۆ بەشداریی کۆبوونەوەی دەستەی ئاشتی بکات، ئەوە دەبێتە یەکەم کۆبوونەوەی گشتیی ئەو لەگەڵ سەرکردە عەرەب و موسڵمانەکان لە دوای هێرشەکانی 7ـی ئۆکتۆبەر و شەڕی غەززە.

پەیوەست بەم بابەتەوە: تاوەکو ئێستا هیچ لێدوانێکی فەرمی لە لایەن کۆشکی سپی و وەزارەتی دەرەوەی ئەمریکاوە ڕانەگەیەندراوە.