ئایا چیتر متمانە بە کۆترەکان دەکرێت؟ ڕووسیا باڵندە و کۆتر وەک سیخووڕ بەکاردەهێنێت

ئاڤا نیوز

ڕووسیا پڕۆژەیەکی سەرسوڕهێنەری دەستپێکردووە کە تێیدا کۆتری ڕاستەقینە دەگۆڕێت بۆ "درۆنی سیخوڕی". زاناکان چیپێکی زۆر بچووک دەخەنە ناو مێشکی کۆترەکان و کامێرایەکیش بە سنگیانەوە دەبەستن.

چیرۆکی سەرەکی: لە ڕێگەی ڕیمۆت کۆنتڕۆڵەوە، مرۆڤ دەتوانێت فەرمان بە مێشکی کۆترەکە بدات کە بۆ کوێ بڕوات، ڕێک وەک ئەوەی یارییەکی ئەلیکترۆنی کۆنتڕۆڵ بکەیت، ئەم کۆترانە ڕۆژانە 300 میل دەفڕن و بەهۆی ئەوەی وزەی خۆر بەکاردەهێنن، پێویستیان بە شەحنکردنەوە نییە.

مەترسییەکان: مەترسیی گەورە لێرەدا ئەوەیە کە کۆتری ئاسایی لە هەموو شوێنێک هەیە و کەس گومانی لێ ناکات.

بۆچی گرنگە: ئەم "بایۆ-درۆنانە" دەتوانن بچنە ناو حەوشەی ماڵان، بنکە سەربازییەکان و شوێنە زۆر تەسکەکان کە درۆنی ئاسایی ناتوانێت پێیان بگات.

ئەوەی لەبارەیەوە دەگوترێت: پسپۆڕانی سەربازی دەڵێن، ئەمە تەنیا بۆ وێنەگرتن نییە، بەڵکو ڕووسیا دەتوانێت ئەم کۆترانە بەکاربهێنێت بۆ گواستنەوەی نەخۆشی و ڤایرۆس بۆ ناو خاکی دوژمن، بێ ئەوەی کەس بزانێت ئەمە "هێرشێکی بایۆلۆژییە".

ئەوەی پێویستە بیزانیت: ئەم پڕۆژەیە خەرجییەکی زەبەلاحی بۆ دانراوە کە بە نزیکەی 10 ملیۆن پاوەند دەخەمڵێندرێت و ڕاستەوخۆ لەژێر چاودێریی خێزانی پووتیندایە. ڕووسیا تەنیا بە کۆتر نەوەستاوە، بەڵکو دەیەوێت قەلەڕەش و مەلەکانیش بە هەمان چیپ-یان تێدا جێگر بکات بۆ کاری قورس.