ڕانیە؛ دوو منداڵی دووانە بەهۆی دووکەڵی سۆپاوە خنکان

ئاڤا نیوز

دوو منداڵی دووانەی تەمەن شەش ساڵ لە ڕانیە، بە هۆی دووکەڵی سووتانی فەرشەوە گیانیان لەدەست دا.

چیرۆکی سەرەکی:  خێزانێکی دانیشتووی شاری ڕانیە لە گەڕەکی تیتۆکە کە خاوەنی چوار منداڵن، شەوی ڕابردوو هیتەری ژووری نوستنی سێ منداڵەکەیان بە هەڵکراوی جێهێشتووە، بەهۆی نزیکیی فەرەشێک لە هیتەرەکەوە، فەرشەکە گڕی گرتووە و ژوورەکە پڕ بووە لە دووکەڵ؛ لە ئەنجامدا دوو منداڵە دووانەکە کە لەو ژوورەدا خەوتبوون، پێش گەیاندنیان بۆ نەخۆشخانە بەهۆی خنکانەوە گیانیان لەدەستداوە.

لێدوانی فەرمی: مەریوان محەممەد کە باوکی دوو منداڵەکەیە، بە ئاڤای ڕاگەیاند، "کاتژمیر 5:00ی سەر لە بەیانی ئەمڕۆ بەر لەوەی بچمە سەر کار، بینیم دووکەڵ لە ژووری منداڵەکان بەرز دەبێتەوە، دوو منداڵەكەم لەسەر زەوی كەوتبوون، هەرچەندە هەردووکیانم گەیاندە نەخۆشخانە، بەڵام بەداخەوە گیانیان لەدەستدابوو".

دەشڵێ: منداڵەكان دووانەبوون یەکێکیان نەخۆشی شەلەل دەماغی هەبوو، ئەوی دیکەش نەخۆشییەكی تری قورسی هەبوو.

لەلایەكی دیكەوە: سەرچاوەیەک لە نەخۆشخانەی فریاکەوتنی ڕانیە ڕایگەیاند:  بەرەبەیانی ئەمڕۆ تەرمی دوو منداڵی دووانە بە ناوەکانی میر مەریوان (کوڕ) و مەیلی مەریوان (کچ) گەیێنرانە نەخۆشخانەکەمان؛ پشکنینە سەرەتاییەکان دەریانخستووە کە منداڵەکان تەمەنیان شەش ساڵە و پێش گەیاندنیان بە نەخۆشخانە، بەهۆی هەڵمژینی بڕێکی زۆر لە دووکەڵ و بۆن گیانیان لەدەست داوە.

زانیاریی زیاتر:  بەپێی زانیارییەكانی ئاڤا، چیرۆكی ڕووداوەكە بەمشێوەیە بووە:-

خێزانەکە خاوەنی چوار منداڵن، منداڵە بچووکەکە لە ژووری دایک و باوکیان خەوتووە، بەڵام سێ منداڵەکەی دیکە، کە میر مەریوان و مەیلی مەریوان و منداڵێکی دیکەیان کە 1 ساڵ لەوان گەورەترە، بەیەکەوە لە ژووری خۆیان خەوتبوون و شەو هیتەرەکەیان نەكوژاندووەتەوە، فەرشێک كە لە نزیک هیتەرەکە بووە گڕی گرتووە و دووكەڵێكی زۆر دروست بووە، بەو هۆیەوە دوو لە منداڵەكان خنكاون و منداڵەكەی دیكە سەلامەتە.