پێداچوونەوە بۆ دۆسییەی ئێپستین دەکرێت

ئاڤا نیوز

وەزارەتی دادی ئەمریکا بڕیاری دا ڕێگە بە ئەندامانی کۆنگرێس بدات پێداچوونەوە بە فایلە بێ سانسۆر و دەستکارینەکراوەکانی دۆسییەی جێفری ئێپستین بکەن.

چیرۆکی سەرەکی: کردنەوەی دەرگای ئەم دۆسییە هەستیارە دوای گوشارێکی تووندی هەردوو پارتی کۆماری و دیموکرات دێت کە پێیان وایە سانسۆرکردنی ناوەکان و وێنەکان لەلایەن وەزارەتی دادەوە، هەوڵێکە بۆ پاراستنی ئەو کەسایەتییە کاریگەرانەی تێوەگلاون.

لێدوانی فەرمی: ڕۆو خانا، ئەندامی کۆنگرێسی ئەمریکا لەسەر پشکی دیموکراتەکان، کە سەرپەرشتیی هەوڵەکانی بۆ شەفافییەتی دۆسییەکە دەکرد، ڕایگەیاند: ئەم هەنگاوەی وەزارەتی داد بە ئەرێنی دەبینین؛ کاتێک کۆنگرێس گوشار دەکات، سەرکەوتن بەدەستدەهێنێت.

زانیاریی زیاتر: وەزارەتی دادی ئەمریکا، نامەیەکی بۆ یاسادانەران ناردووە و تێیدا پێی ڕاگەیاندوون کە ئەندامانی کۆنگرێس دەتوانن ڕۆژی دووشەممە 9-2-2026 پێداچوونەوە بۆ فایلە بێ سانسۆر و دەستکارینەکراوەکانی دۆسیەی ئێپستین بکەن.

ئەوەی پێویستە بیزانیت: ماوەیەک لەمەوپێش، زیاتر لە 3,000,000 فایل لەسەر دۆسییەی جێفری ئێپستین بڵاوکرایەوە، بەڵام بەشێکی زۆری ئەو فایلانە سانسۆر کرابوون، ئێستا بەهۆی گوشاری بەردەوامی هەردوو پارتی کۆمارییەکان و دیموکراتەکان، ڕێگە دەدرێت ئەندامانی کۆنگرێس بە بێ سانسۆر فایلەکان بخوێننەوە و پێداچوونەوەی بۆ بکەن.

پەیوەست بەم بابەتەوە: بۆ ئەوەی ئەندامێکی کۆنگرێس دەستی بە فایلە بێ سانسۆرەکان بگات، پێویستە 24 کاتژمێر پێشتر وەزارەتی داد ئاگادار بکاتەوە، لەگەڵ ئەوەشدا تەنیا ئەندامانی کۆنگرێس دەتوانن تەماشای فایلەکان بکەن و یاریدەدەر و کەسە نزیکەکانیان بۆیان نییە دەستیان بە فایلەکە بگات. وەزارەتی دادی ئەمریکا بڕیاریداوە کە شوێنێکی تایبەت بۆ خوێندنەوەی فایلەکان دەستنیشان بکات و بردنە ژوورەوەی مۆبایل و کامێرا و ئامێرەکانی دیکە قەدەغە دەبێت؛ ئەندامانی کۆنگرێس بۆیان هەیە بە پێنووس و کاغەز تێبینییەکانیان بنووسن، بەڵام بۆیان نییە کۆپی فایلەکان بکەن.

باکگراوند: جێفری ئێپستین ملیاردێرێکی ئەمریکی بوو کە لە ساڵی 2019دا لە زیندان کۆتایی بە ژیانی جۆی هێنا، دوای ئەوەی بە تۆمەتی بازرگانیکردن بە سێکس و دەستدرێژی بۆ سەر منداڵان دەستگیر کرا. فایلەکانی ئێپستین (Epstein Files) بەهۆی ئەوەی ناوی چەندین سەرکردە، پاشا، ملیاردێر و کەسایەتیی جیهانیی تێدایە، وەک "بۆمبێکی سیاسی" دەبینرێن. لە ساڵانی 2024 و 2025دا چەندین بەشی ئەم فایلانە بڵاوکرانەوە.