عێراق دەکەوێتە ناو بۆشاییەکی دەستوورییەوە

ئاڤا نیوز

دوای تێپەڕبوونی زیاتر لە 30 ڕۆژ بەسەر یەکەم کۆبوونەوەی پەرلەمانی عێراق، ئێستا بەپێی ماددەی (72/ دووەم/ ب)ـی دەستوور، لە ڕووی کردارییەوە عێراق کەوتووەتە ناو بۆشاییەکی دەستوورییەوە؛ چونکە دەبوایە لە ماوەی 30 ڕۆژدا لە ڕێکەوتی یەکەم دانیشتنی پەرلەمان، سەرۆککۆمار هەڵبژێردرایە و کەسێکیش بۆ پێکهێنانی حکوومەتێکی نوێ ڕاسپێردرایە.

چیرۆکی سەرەکی: بەهۆی نەبوونی نیسابی یاساییی دوو لەسەر سێ و ڕێکنەکەوتنی لایەنەکان، ماوە زێڕینەکەی هەڵبژاردنی سەرۆککۆمار لە 29ـی کانوونی دووەمی ڕابردووەوە کۆتایی هاتووە. سەرۆکوەزیرانیش بەهۆی ململانێی ناو ماڵی شیعەوە تا ئێستا مشتومڕی لەسەرە، هەرچەندە چوارچێوەی هەماهەنگی بە فەرمی نووری مالیکی، سەرۆکی هاوپەیمانیی دەوڵەتی یاسای بۆ پێکهێنانی حکوومەتێکی نوێ ڕاسپاردووە.

لێدوانی فەرمی: شارەزایانی یاسایی و سیاسی هۆشداری دەدەن لەوەی ئەوەی ئێستا ڕوو دەدات تەنیا دواکەوتنی سیاسی نییە، بەڵکوو پێشێلکارییەکی دەستووریی ڕوونە؛ ئاماژە بەوە دەدەن هەرچەندە دادگای فیدراڵی دەرچەیەکی بۆ ڕێگری لە داڕمانی دەسەڵات دۆزیوەتەوە، بەڵام بەردەوامبوونی ئەم دۆخە دەبێتە هۆی لەدەستدانی متمانەی هاووڵاتییان بە پڕۆسەی دیموکراسی و دەڵێن: "ئەم چەقبەستووییە سیاسییە ئەگەر چارەسەر نەکرێت، لەوانەیە کێشەی سیاسی و ئابووریی گەورەی لێ بکەوێتەوە."

زانیاریی زیاتر: بەپێی لۆژیکی یاسایی و پەیڕەوی ناوخۆی ئەنجوومەنی وەزیران، حکوومەت لەم قۆناغەدا دەسەڵاتە تەواوەتییەکانی لە دەست داوە و بۆی نییە پێشنیازی پڕۆژەیاسا بکات (کە گرنگترینیان یاسای بودجەی گشتییە)، یاخود گرێبەستە گەورەکان و ڕێککەوتننامە نێودەوڵەتییەکان واژۆ بکات و پلە تایبەتەکان و پۆستە باڵاکان دابمەزرێنێت.

ئەمەش بزانە: سەبارەت بە پۆستی سەرۆککۆمار، هەرچەندە وادە دەستوورییەکەی کۆتایی هاتووە، بەڵام ئێستا بە دەسەڵاتی سنووردارەوە لە ئەرکەکانی بەردەوام دەبێت تا ئەو کاتەی جێگرەوەیەکی بۆ هەڵدەبژێردرێت. ئەمەش تەنیا بۆ پاراستنی پێکهاتەی دەوڵەت و واژۆکردنی ئەو مەرسوومانەیە کە زۆر پێویستن.