مۆسکۆ: نزیکین لە ڕێککەوتنی ئاگربەست لەگەڵ کیێڤ

ئاڤا نیوز

 

ڕووسیا ڕایگەیاند، دانوستانەکانی لەگەڵ ئۆکراینا لە ئیستەنبووڵ ئەنجامێکی باشی لێکەوتووەتەوە و لەوانەیە بگەینە ئاگربەست.

 

وێنە گەورەکە: ڕۆژی هەینی 16-5-2025، یەکەم دانوستانی ڕاستەوخۆ دوای سێ ساڵ لە نێوان ڕووسیا و ئۆکراینا لە ئیستەنبووڵ بە ئامادەبوونی هاکان فیدان، وەزیری دەرەوەی تورکیا کۆتایی هات، هەردوولا دەرئەنجامەکانیان بە بەرهەمدار و ئەرێنی وەسف کرد.

 

لێدوانی فەرمی: شاندی ڕووسیا بۆ دانوستانەکان ڕایگەیاند، دەرئەنجامەکانی گفوتوگۆکانمان لەگەڵ ئۆکراینا ئەرێنی بوون، دەرئەنجامەکان بەم شێوەیە بوون: گەورەترین ئاڵۆگۆڕی بارمتەکان لە نێوان هەردوولا، نزیکین لە ڕێککەوتنی ئاگربەست، لێکتێگەیشتن و بەردەوامی دان بە گفتوگۆکان.

 

پێدراوە ڕاستەکان: مۆسکۆ و کیێڤ لەسەر ئاڵۆگۆڕکردنی هەزار دیلی جەنگ رێککەوتن، هەردوولا تاوتوێی ئەگەری ئاگربەست و کۆبوونەوەی لووتکەی نێوان سەرۆکەکانی هەردوولاشیان کرد.

 

زانیاریی زیاتر: بڕیاربوو کۆبوونەوەکان لە ڕۆژی پێنجشەممە بەڕێوەبچن بەڵام بەهۆی ناکۆکی هەردوولا ڕۆژی هەینی کۆبوونەوەکان بە بە سەرۆکایەتی ڤلادیمێر میدینسکی، ڕاوێژکاری سەرۆکی ڕووسیا و ڕوستەم عومەرۆڤ، وەزیری بەرگری ئۆکراینا بەڕێوەچوو.