سەرۆك بارزانی لەگەڵ ستافی نوێی مەكتەبی سكرتاریەتی یەكێتیی قوتابیان و لاوان كۆبووەوە

ئاڤا نیوز

سەرۆك بارزانی، سكرتێر و ئەندامانی نوێی مەكتەبی سكرتاریەتی یەكێتیی قوتابیان و لاوانی دیموكراتی كوردستان، لەسەر گرنگیدان بە هەستی نەتەوەیی و نیشتمانپەروەری و بەها باڵاكانی كوردایەتی، هاندەدات.

چیرۆكی سەرەكی: دوای سێ ڕۆژ لە بەستنی كۆنگرەی یەكگرتنی هەردوو ڕێکخراوی یەكێتیی قوتابیانی كوردستان و یەكێتیی لاوانی دیموكراتی كوردستان، سەرۆك بارزانی لە سەڵاحەددین، لەگەڵ سكرتێر و ئەندامانی نوێی مەكتەبی سكرتاریەتی یەكێتیی قوتابیان و لاوانی دیموكراتی كوردستان كۆبووەوە و جارێكی تر دەستخۆشی لە سەركەوتنی كۆنگرەكە كرد.

ڕاگەیێنراوی فەرمی: بارەگای بارزانی لەبارەی كۆبوونەوەكە ڕاگەیێنراوێكی بڵاوكردووەتەوە و ئاماژەی بەوە كردووە، سەرۆک بارزانی وێڕای پیرۆزبایی بۆ سەرکەوتنی کۆنگرەی یەکگرتن، كۆنگرەكەی بە جیاواز و دەستپێكی باش وەسف كرد و دەستخۆشی لە سەرپەرشتیارانی کۆنگرە كردووە.

- هاوكات هەموو پاڵپشتی و پشتگیرییەکی خۆی بۆ یەکێتی قوتابیان و لاوانی دیموکراتی کوردستان دووپات کردەوە لەسەر گرنگیدان بەهەستی نەتەوایەتی و نیشتمانپەروەری و پاراستنی بەها باڵاکانی کوردایەتی و ڕێزگرتن لە ئافرەتان و هێنانە پێشەوەیان بۆ ناو کایەی ڕێکخراوەیی و گرنگیدان بە توێژی قوتابیان و لاوان.

- سەرۆك بارزانی لەو كۆبوونەوەیە، ئاماژەی بە چەندین وێستگەی مێژوویی خەبات و قوربانیدانی قوتابیان و لاوان لەناو ڕیزەکانی شۆڕشی ئەیلوول و گوڵان و هەتا ئەمڕۆ دا.

باكگراوند: ڕۆژی پێنجشەممە 15-5-2025، کۆنگرەی یەکگرتنی هەردوو ڕێکخراوی یەكێتیی قوتابیانی كوردستان و یەكێتیی لاوانی دیموكراتی كوردستان، بە سەرپەرشتی سەرۆک بارزانی و ئامادەبوونی مەسرور بارزانی، جێگری سەرۆکی پارتی دیموکراتی کوردستان بەڕێوەچوو. شڤان مەحموود وەک سکرتێری ڕێکخراوەکە هەڵبژێردرا، هاوکات ستافی نوێی سکرتاریەت هەڵبژێردران.