وەزیری سامانە سروشتییەکان: 64%ـی ژێرخانی کارەبای کوردستان بەرهەمی کۆمپانیا ئەمریکییەکانە

ئاڤا نیوز

وەزیری سامانە سروشتییەکان لە کۆنفراسی وزەی واشنتن دەڵێت: حکومەتی هەرێمی کوردستان پاڵپشتییەکی زۆر لە کەرتی کارەبا دەکات، هاوکات ڕێژەیەکی بەرزی ژێرخانی کارەبای کوردستان لەلایەن کۆمپانیا ئەمریکییەکانە.

وێنە گەورەکە: بە بەشداری مەسرور بارزانی، سەرۆکوەزیرانی کوردستان و کریستۆفەر ڕایت، وەزیری وزەی ئەمریکا کۆنفراسی وزە لە واشنتن بەڕێوەدەچێت، لە پانێلێکی ئەو کۆنفراسە، وەزیری سامانە سروشتییەکانی هەرێمی کوردستان لەبارەی دوایین گرێبەستەکانی وەزارەتی سامانە سروشتییەکان و دوو کۆمپانیای ئەمریکی بۆ پەرەپێدانی گازی هەرێمی کوردستان قسەی کرد.

لێدوانی فەرمی: کەمال محەممەد، وەزیری سامانە سروشتییەکان دەڵێت: ئەم ڕێککەوتننامەیەی هەرێمی کوردستان کردوویەتی دژی هیچ لایەنێک نییە و ئەم هەنگاوانە بۆ باشترکردنی خزمەتگوزارییەکانە لە کوردستان و عێراق، داوا لە ئەمریکا دەکەین پاڵپشتیی زیاتری هەرێمی کوردستان بکات.

وەزیری سامانە سروشتییەکان ئەمانەشی وت:

- هەرێمی کوردستان ئامادەیە گرێبەستی دیکە واژۆ بکات.

- هەرێمی کوردستان ئامادەیە لە کەرتەکانی نەوت و غاز و کارەبا گرێبەستی دیکە بکات.

- زیاتر لە 11 ملیۆن بەرمیل نەوتمان ڕادەستی وەزارەتی نەوتی عێراق کرد تا ئێستا شایستەی کۆمپانیاکانیان نەداوە.

- بەهۆی لووتکەی عەرەبی گفتوگۆ لەبارەی هەناردەکردنی نەوت وەستابوو.

باکگراوند: شەوی 20ـی ئەم مانگە  بە ئامادەبوونی مەسرور بارزانی، سەرۆکوەزیرانی کوردستان لە واشنتن، وەزارەتی سامانە سروشتییەکانی هەرێمی کوردستان دوو گرێبەستی بۆ پەرەپێدانی دوو کێڵگەی گاز سروشتی واژۆ کرد کە بەهاکەیان 110 ملیار دۆلار بوو.