عەباس عێراقچی: ئێران بێدەنگ نابێت بەرانبەر تاوانەکانی ئیسرائیل

ئاڤا نیوز
 
ئەمڕۆ شەممە، وەزیری دەرەوەی ئێران دووپاتی کردەوە کە ئەو پارێزبەندییەی بە ئیسرائیل دراوە زیانی بە سیستمی دادوەریی نێودەوڵەتیی گەیاندووە و ئێرانیش بێدەنگ نابێت بەرانبەر تاوانەکانی ئیسرائیل

لێدوانی فەرمی: عەباس عێراقچی ڕایگەیاند: پرسی فەلەستین وەک هیچ پرسێکی دیکە نییە، ئاڵنگارییەکی گەورەیە بۆ کاریگەری یاسای نێودەوڵەتی، ئەوەی ئێمە لە غەززە  دەیبینین شەڕ یان ململانێی نێوان لایەنەکان نییە، بەڵکو لەناوبردنی بە ئەنقەستی ژیانی مەدەنی و جینۆسایدی خەڵکی مەدەنییە". وتیشی: "ئەوەی بەسەر فەلەستینییەکاندا دێت، شکستێکی گەورەی ئەخلاقییە بۆ هەموو ئەوانەی شایەتحاڵی ئەم پێشێلکارییانەن و تەسلیمی ئەو پێشێلکارییانەن."

زانیاریی زیاتر: وەزیری دەرەوەی ئێران ئاماژەی بەوەشکرد: "وڵاتەکەی نایەوێت بازنەی ململانێکان فراوانتر بێت، بەڵام هاوکات بێدەنگ نابێت بەرانبەر بەو (هەڕەشە و تاوانانەی) کە ئیسرائیل ئەنجامیان دەدات". 
ئەو وتی: "پێویستە جیهان تێبگات کە ئاسایشی جیهان پرسێکی بەش بەش نییە و ناتوانرێت ئاسایش بۆ لایەک دابین بکرێت لەسەر حیسابی وێرانکردنی ئاسایشی وڵاتانی دیکە."

لە کۆتاییدا وتی: دەبێت لێپرسینەوە لەم پێشێلکاریییە گەورانەی ئیسرائیل هەبێت، سزا بەسەر ئیسرائیلدا بسەپێندرێت، کۆمەڵگەی نێودەوڵەتیش کۆتایی بەو داگیرکارییە بهێنێت و کاربکات بۆ دامەزراندنی دەوڵەتی فەلەستین.

پەیوەست بەم بابەتەوە: ئەم لێدوانەی وەزیری دەرەوەی ئێران لە کاتێکدایە دوێنێ، گەڕی دووەمی دانوستانی نێوان هەردوو شاندی ئەمریکا و ئێران بە ناڕاستەوخۆ لە مەسقەتی پایتەختی عومان بەڕێوە چوو، وەزیری دەرەوەی ئێران ڕایگەیاندبوو، گفتوگۆمان لەگەڵ ئەمریکا سەرەتاییەکی باش بوو، لە دانیشتنەکانی پێشووتر زۆر باشتر بەڕێوەچوو، کۆبوونەوەکانیشمان بەردەوامی دەبێت.