ئەمریکا کاروانێکی نوێی دەستگیرکراوانی داعش ڕەوانەی عێراق دەکات

ئاڤا نیوز

لە چوارچێوەی ڕێککەوتنێکی سێقۆڵیی نێوان هێزەکانی هاوپەیمانان، سوپای سووریا و هێزەکانی سووریای دیموکرات (هەسەدە)، هێزەکانی ئەمریکا سێیەم کاروانی دەستگیرکراوانی ڕێکخراوی تیرۆریستیی داعشیان لە زیندانی غوێران لە پارێزگای حەسەکەی سووریاوە، بە ڕێگەی وشکانی بۆ عێراق گواستەوە.

زانیاریی بەدەستهاتوو: بەپێی زانیارییەکان، ئەم کاروانە نزیکەی 500 دەستگیرکراو لە خۆ دەگرێت؛ ئەمەش دوای ئەوە دێت کە فەرماندەیی ناوەندیی ئەمریکا (سێنتکۆم) لە مانگی یەکی ڕابردوودا، پلانی گواستنەوەی حەوت هەزار دەستگیرکراوی داعشی لە باکووری ڕۆژهەڵاتی سووریاوە بۆ عێراق ئاشکرا کردبوو.

زانیاریی زیاتر: هاوکات لەگەڵ ئەم گواستنەوانەدا، هێزەکانی ئەمریکا زۆربەی تاوەرەکانی چاودێرییان لە دەوروبەری بنکەی سەربازیی شەدادی لە حەسەکە چۆڵ کردووە و ئاڵای وڵاتەکەیان لەسەر هەندێک لەو تاوەرانە داگرتووە.

لە لایەکی دیکەوە: ئەنجوومەنی باڵای دادوەریی عێراق ڕایگەیاند، دادگای لێکۆڵینەوەی کەرخ دەستی کردووە بە لێکۆڵینەوە لەگەڵ 1,387 چەکداری داعش کە لەم دواییانەدا لە سووریاوە ڕادەستی عێراق کراونەتەوە و ئێستاش لە قۆناغی بەدۆکیۆمێنتکردنی زانیارییەکاندان.

ئەمەش بزانە: ئەم گۆڕانکارییانە دوای ئەوە دێن کە هێزەکانی هەسەدە لە کەمپی "هۆل" پاشەکشەیان کرد و سوپای سووریا کۆنترۆڵی کەمپەکە و دەوروبەری گرتە دەست.